पणजी: हरमल येथील खालचावाडा परिसरात उघडकीस आलेल्या वेश्याव्यवसाय प्रकरणात म्हापसा येथील उत्तर गोवा अतिरिक्त सत्र न्यायालयाने संशयित शिबानी दास (३४) आणि संजय कुमार (२८) यांना सशर्त जामीन मंजूर केला आहे. पोलिसांनी वाचविलेल्या महिलांनी न्यायदंडाधिकाऱ्यांसमोर साक्ष नोंदवण्यास नकार दिल्याने प्रथमदर्शनी ठोस पुरावे उपलब्ध नसल्याचे निरीक्षण नोंदवत न्यायालयाने हा जामीन मंजूर केला. १७ फेब्रुवारी २०२६ रोजी मांद्रे पोलिसांनी नारायणदेव मंदिराजवळ केलेल्या कारवाईत दोघांना अटक केली होती.

या प्रकरणाच्या तपासादरम्यान पोलिसांनी सात महिलांची सुटका केल्याचा दावा केला होता. मात्र, न्यायालयाच्या निरीक्षणानुसार या महिलांनी तपासात सहकार्य केलेले नाही. स्वयंसेवी संस्थेच्या उपस्थितीत नोंदवलेल्या जबाबांमधून कोणतीही ठोस माहिती समोर आलेली नसल्याचेही नमूद करण्यात आले आहे. तसेच, सातपैकी सहा पीडित तरुणींनी न्यायदंडाधिकाऱ्यांसमोर जबाब देण्यास स्पष्ट नकार दिला आहे. त्यामुळे सरकारी पक्षाची बाजू कमकुवत ठरली असून, संशयितांनी महिलांना वेश्याव्यवसायासाठी प्रवृत्त केल्याचे कोणतेही ठोस प्रथमदर्शनी पुरावे तपास अधिकाऱ्यांच्या कागदपत्रांत आढळले नाहीत.

बचाव पक्षाच्या वकिलांनी न्यायालयात युक्तिवाद केला की, माजी सरपंचांच्या नेतृत्वाखालील एका गटाने केवळ मालमत्तेतून बाहेर काढण्यासाठी हा खोटा गुन्हा दाखल केला आहे. याउलट, सरकारी वकिलांनी भारतीय न्याय संहिता कलम १४३(३) अंतर्गत हा गंभीर गुन्हा असून त्यात जन्मठेपेची तरतूद असल्याचा युक्तिवाद केला. मात्र, संशयितांची कोणतीही गुन्हेगारी पार्श्वभूमी नसून तपास बराचसा पूर्ण झाल्याने त्यांना कोठडीत ठेवण्याची गरज नसल्याचे न्यायालयाने नमूद

केले.

परेश भट्टी यापूर्वीच सुटला

या प्रकरणातील तिसरा संशयित परेश भट्टी (३९, गुजरात) याला न्यायालयाने २४ मार्च २०२६ रोजीच सशर्त जामीन मंजूर केला होता. भट्टी हा केवळ ‘ग्राहक’ म्हणून त्या ठिकाणी उपस्थित होता आणि ‘तस्करी’मध्ये त्याचा कोणताही सहभाग नसल्याचे न्यायालयाने स्पष्ट केले होते.