Goa Panchayat: ग्रामस्थांना सोईस्कर सुविधा देण्यासाठी गोवा राज्य सरकारतर्फे ग्रामपंचायतीमध्ये अतिरिक्त नऊ ऑनलाईन सेवा देण्याची घोषणा करण्यात आली आहे. सरकारने याबाबत अधिसूचना काढली आहे.

पंचायत पातळीवरील या सेवा ऑनलाईन पद्धतीने गोवा ऑनलाईन पोर्टलवर 3 ऑक्टोबरपासून उपलब्ध होणार आहेत. या सेवांचे शुल्कही निश्चित केले आहे.

ऑनलाईन मिळणाऱ्या सेवा आणि शुल्क

बांधकाम परवाना अर्ज (500 रुपये), व्यापार परवाना फलक वा जाहिरात लावण्यासाठी अर्ज (50 रुपये), भोगवटा प्रमाणपत्र अर्ज (500 रुपये), जन्म दाखला (10 रुपये),

मृत्यू दाखला (10 रुपये), पाणी जोडणीसाठी ना हरकत दाखला (50 रुपये), वीज जोडणीसाठी ना हरकत (50 रुपये), उत्पन्नाचा दाखला (10 रुपये), रहिवासी दाखला (10 रुपये).

माहिती-तंत्रज्ञान खात्याने सुरू केलेल्या सिटीझन सर्व्हिसेस सेंटरअंतर्गत 27 विभागांच्या 170 सेवा ऑनलाईन करण्यात आल्या आहेत. ‘ग्रामीण मित्र’ संकल्पनेद्वारे सरकारी सेवा घराघरांत पोहोचवण्यात येणार आहेत. अशी घोषणा मुख्यमंत्री सावंत यांनी मे महिन्यात केली होती.

आयटी खात्याच्या वतीने ‘ग्रामीण मित्र’ नेमण्यात येणार असून या ग्रामीण मित्रांमार्फत  सरकारी  योजना लोकांपर्यंत पोहोचवण्यासाठी प्रयत्न केले जातील. केंद्र सरकारच्या ‘डिजिटल इंडिया’ या महत्त्वाकांक्षी योजनेनुसार डिजिटल गोवा हे देशातील पहिले राज्य ठरणार आहे.