Goa Govt Manohar Parrikar Yuva Scientist Award (MPYSA)

गोवा सरकारकडून मोठी घोषणा करण्यात आली आहे. देशातील युवा शास्त्रज्ञांना प्रोत्साहन देण्यासाठी गोवा सरकारने दरवर्षी दिवंगत माजी मुख्यमंत्री मनोहर पर्रीकर युवा शास्त्रज्ञ पुरस्कार देण्याची घोषणा केली आहे. या पुरस्काराच्या माध्यमातून युवा शास्त्रज्ञांना पाच लाख रूपये बक्षीस स्वरूपात देण्यात येणार आहेत.

विज्ञान - तंत्रज्ञान आणि कचरा व्यवस्थापन विभागाच्या वतीने मनोहर पर्रीकर युवा शास्त्रज्ञ पुरस्काराची घोषणा करण्यात आली आहे. विज्ञान - तंत्रज्ञान आणि संशोधन विषयात उत्कृष्ट कामगिरी करणाऱ्या देश पातळीवरील युवा शास्त्रज्ञांना प्रोत्साहन देण्यासाठी या पुरस्काराची घोषणा करण्यात आलीय.

या पुरस्कारामार्फत पाच लाख रूपयांचे बक्षीस एका शास्त्रज्ञाला देण्यात येईल, बक्षीस रकमेची दरवर्षी संबधित विभागाच्या अर्थसंकल्पात केली जाईल.

शास्त्रज्ञ भारतीय नागरिक असावा त्याचे वय 35 पेक्षा अधिक असू नये. विज्ञान - तंत्रज्ञान आणि संशोधन विषयात त्याने काम केलेले असावे आणि एका शास्त्रज्ञाला एकदाच हा पुरस्कार घेता येईल असे सरकारच्या वतीने प्रसिद्ध केलेल्या प्रसिद्धीपत्रकात म्हटले आहे.

दरवर्षी पुरस्कारासाठी अर्ज मागविल्यानंतर उमेदवारांना विभागाच्या ईंमेलवरती अर्ज करावा लागेल. विभागाकडून अर्ज शॉर्टलिस्ट केले जातील त्यानंतर तज्ञ समितीसमोर अखेरचे प्रेझेंटेशन होईल.