पणजी : रेंट अ कॅब व रेंट अ कार परवाने आपण बंद केले आहेत. त्यांच्यामुळे वाहतूक कोंडी होत होती. त्यामुळे आपणास तो निर्णय घ्यावा लागला. विधानसभेत मोटारसायकल पायलटांसाठी विशेष योजना आपण जाहीर केली आहे. पर्यटनात या सेवेचा मोठा वाटा आहे. कोणाला मोटारसायकल पायलट व्यवसाय करायचा आहे, त्यांना परवाना दिला जाईल, अशी घोषणा वाहतूकमंत्री माविन गुदिन्हो यांनी केली.

येथील कदंब बसस्थानक परिसरात उभारलेल्या मोटारसायकल पायलटांसाठीच्या शेडचे हस्तांतरण केल्यानंतर ते बोलत होते. याप्रसंगी रोटरी क्लबचे जिल्हा गव्हर्नर शरद पै, गौरीश धोंड, निखील लवंदे, तन्वी सावंत, मिथिला नाडकर्णी, कदंब परिवहन महामंडळाचे डेरिक नेटो, मोटारसायकल पायलट संघटनेचे अध्यक्ष सुरेश ठाकूर उपस्थित होते.

गुदिन्हो म्हणाले, रोटरी क्लबने केलेले कार्य कौतुकास्पद आहे. मोटारसायकल पायलट कष्ट घेतात. मोठ्या संख्येवरून पायलट संख्या कमी झाली आहे, त्याला वेगवेगळी कारणे आहेत. अनेक वर्षे पर्यटन व स्थानिकांसाठी सेवा देणारी ही मोटारसायकल पायलट सेवा आहे. त्यांच्यासाठी निवृत्ती योजना, नवे इलेक्ट्रिक वाहन घेण्यासाठी आर्थिक मदत योजना सुरू होईल. राज्यात ईव्ही बसेससाठी चार्जिंग स्टेशनची गरज आहे, त्यावर उपाय काढला जात आहे. प्रदूषण रोखण्यासाठी या बसेस महत्त्वाच्या असल्याने व इतर इलेक्ट्रिक वाहनेही वाढणार असल्याने त्यादृष्टीने चार्जिंग स्टेशन वाढणे आवश्‍यक आहे.

सुरेश ठाकूर म्हणाले, मोटारसायकल पायलट कमी झालेले आहेत. यापूर्वी सात हजार पायलट होते, ते आता दोन हजारांपर्यंत आहेत. आता पायलटांसाठी परवाने देणे बंद झाले आहे, हे परवाने देण्यास सरकारने सुरवात करावी. कारण कोण पायलट होऊ इच्छित असेल तर त्यांना ती संधी मिळावी. ज्यांना कोणास परवाने हवे असतील तर त्यांना ते द्यावेत, अशी मागणी त्यांनी केली.