पणजी: गोवा राज्य सरकारने निवृत्तीवेतनधारक आणि कुटुंब निवृत्तीवेतनधारकांसाठी केंद्र सरकारचा सुधारित महागाई भत्ता (डेअरनेस रिलिफ) दराचा स्वीकार केला आहे. त्यामुळे १ जानेवारी २०२६ पासून लागू होणाऱ्या या निर्णयान्वये महागाई भत्ता ५८ टक्क्यांवरून ६० टक्के (मूळ निवृत्तीवेतन) पर्यंत वाढविण्यात आला आहे.

राज्य वित्त विभागाने (महसूल आणि नियंत्रण विभाग) जारी केलेल्या निवेदनानुसार, ही वाढीव महागाई मदत १ जानेवारी २०२६ ते ३१ मे २०२६ या कालावधीच्या थकबाकीसह, जून २०२६च्या निवृत्तीवेतनाच्या जोडीने अदा केली जाईल.

हा सुधारित दर केंद्राच्या एका निर्णयावर आधारित आहे. ज्यामध्ये केंद्र सरकारचे निवृत्तीवेतनधारक आणि कुटुंब निवृत्तीवेतनधारकांसाठी अतिरिक्त २ टक्के महागाई भत्ता मंजूर करण्यात आला होता.

या लाभाचा समावेश निवृत्तीवेतनधारकांच्या सर्व श्रेणींसाठी करण्यात आला आहे. ज्यामध्ये कुटुंब निवृत्तीवेतनधारक, सशस्त्र दलातील निवृत्तीवेतनधारक, रेल्वे निवृत्तीवेतनधारक, अखिल भारतीय सेवेतील निवृत्तीवेतनधारक आणि तात्पुरते निवृत्तीवेतन प्राप्त करणाऱ्यांचा समावेश आहे.