Goa: पंतप्रधान नरेंद्र मोदी (PM Modi), गृहमंत्री अमित शहा (HM Amit Shah) व मुख्यमंत्री डॉ. प्रमोद सावंत (CM Dr Pramod Sawant) यांच्यासंबंधी गोवा तृणमूल काँगेसने (Goa TMC) जे व्यंगचित्र (Cartoon) प्रसिद्ध केले होते, त्याचा आम्ही युवा मोर्चा एकवोटच्यावतीने (Yuva Morcha Ekvott) निषेध करतो, असे माजी नगरसेवक दाजी साळकर यांनी पत्रकारांशी बोलताना सांगितले. याप्रकरणी संबंधितांनी जाहीर माफी मागावी, असे आवाहनही त्यांनी केले.

याप्रसंगी हरिपाल पटेल, कृष्णा शेट्ये, किशोर वळवईकर, गिरीश बोरकर उपस्थित होते. पंतप्रधान मोदी यांनी जगामध्ये एक आगळे-वेगळे स्थान निर्माण केले आहे. त्यांच्यासंबंधी असे व्यंगचित्र प्रसिद्ध करून तृणमूल काँग्रेसने आपली मानसिकता दाखविली असल्याचा दावा साळकर यांनी केला. पंतप्रधान नरेंद्र मोदी व गृहमंत्री अमित शहा यांच्या मार्गदर्शनाखाली मुख्यमंत्री डॉ. प्रमोद सावंत राज्याचा चौफेर विकास साधत आहेत. सरकारने जनहितासाठी अनेक पावले उचलली आहेत. त्यामुळेच विविध क्षेत्रात उत्तम विकास झालेला आहे.

तृणमूलने प्रसिध्द केलेल्या व्यंगचित्रात या तिन्ही नेत्यांना पायाखाली चिरडण्यात येत असल्याचे दाखवले आहे. त्यांच्या या कृत्याचा आपण निषेध करत आहे. गोवेकर शांत आहेत, तथापि ते तृणमूल काँग्रेसची मानसिकता सहन करणार नाहीत. तृणमूल काँग्रेसने पंतप्रधानपदाची शान ठेवावी. त्यांचा मान राखावा, असे त्यांनी म्हटले. या व्यंगचित्र प्रकाराचा सर्वत्र निषेध होण्याची गरज त्यांनी व्यक्त केली.