Anjuna Vagator Beach: हणजूण वागतोर बीचवर आतषबाजीचे फटाके फोडताना किनाऱ्यालगतच्या सुकलेल्या गवताला आग लागल्याची घटना घडली आहे. किनाऱ्यावर फटाक्याची ठिणगी उडून लगतच्या गवताने पेट घेल्याची प्राथमिक माहिती मिळाली आहे. सुदैवाने या घटनेत कोणतीही जीवित हानी झाली नाही.

घडलेल्या घटनेसंबंधी स्थानिकांकडून अशी माहिती मिळाली की, शुक्रवारी वागातोर बीचवर कार्यक्रम सुरु होता. या कार्यक्रमाच्या दरम्यान किनाऱ्यावर आतषबाजीने फटाके लावण्यात आले होते.

यावेळी समुद्रातून वाऱ्याचा झोत किनाऱ्याच्या दिशेने आल्यावर लावलेले फटाके उडून लगतच्या वाळलेल्या गवतावर पडले. परिणामी गवताने पेट घेतला. याच ठिकाणी काही पर्यटक जमा झाले होते. सुदैवाने त्यातील कुणालाही इजा झाली नाही.

दरम्यान अशीच एक घटना यापूर्वीही घडली असल्याचे स्थानिकांनी सांगितले. मात्र भविष्यातील धोकादायक घटना टाळण्यासाठी प्रशासनाने तातडीने पावले उचलावीत असे आवाहन स्थानिकांनी केलेय.