Goa Ferry Boat : पणजी, हल्लीच नदी परिवहन विभागाने फेरीबोटीतून वाहने नेण्यास लावलेल्या शुल्कावर रिव्होल्युशनरी गोवन्स पक्षाने आक्षेप घेतला आहे. फेरीबोट चालणाऱ्या कित्येक ग्रामीण भागातील लोकांवर हा अन्याय असल्याचे आरजीचे नेते अजय खोलकर म्हणाले.

गुरुवारी पणजी येथे घेण्यात आलेल्या पत्रकार परिषदेत रिव्होल्युशनरी गोवन्स पक्षाने नदी परिवहनमंत्री सुभाष फळदेसाई यांच्यावर फेरीबोटीतून वाहने नेण्यास शुल्क लावल्याने खरमरीत टीका केली.

अजय खोलकर यांनी सांगितले, की नदी परिवहन खाते त्यांना संमत झालेल्या वार्षिक खर्चातून ५ कोटी रुपयांची बचत करत आहे. असे असूनही मंत्री फळदेसाई हे सामान्य जनतेकडून कर वसुली आणि महसूल गोळा करण्याच्या गोष्टी करत आहेत.

जेव्हा नदी परिवहन खात्याकडे ५ कोटी एवढा निधी असूनही मंत्री फळदेसाई यांना महसूल मिळवायचे का सुचत आहे.

यावेळी आरजीच्या चोडण भागातील काही सदस्यांनी त्यांची कैफियत मांडताना नमूद केले की गेली अनेक वर्षे दिवाडी, चोडण, पोंबुर्पा भागातील शेकडो लोक फेरीबोटीतून प्रवास करत आहेत.

खास करून हजारो लोक कामाला, शिकायला फेरीबोटीतून इतर ठिकाणी प्रवास करतात. आता हे शुल्क लावल्याने सामान्य लोकांना, विद्यार्थ्यांना त्रास होणार आहे.

नागरिकांत जागृती करणार

फेरीबोटीत वाहनांना शुल्क आकारण्यास विरोध करून आरजी पक्ष स्थानिक लोकांमध्ये जागृती करणार आहे. गरज पडल्यास पंचायतीत खास ग्रामसभा घेण्यास भाग पाडू आणि फेरीबोट प्रवासावरील कर काढून टाकायला लावू, असे अजय खोलकर यांनी सांगितले. फेरीबोट प्रवासासाठी वाहनांना शुल्क लागू केल्याचा आरजीने निषेध केला आहे.