पणजी: राज्यात तृणमूल कॉंग्रेस भाजपविरोधी आघाडी करण्यासाठी प्रयत्न करीत असताना राष्ट्रवादी कॉंग्रेसनेही (NCP) हालचाली सुरू केल्या आहेत. प्रदेशाध्यक्ष जुझे फिलीप डिसोझा व सरचिटणीस संजय बर्डे यांनी काल मुंबईत पक्षाध्यक्ष शरद पवार (Sharad Pawar) व ज्येष्ठ नेते प्रफुल्ल पटेल यांची भेट घेतली. पवार यांनी गोव्याच्या (Goa) दौऱ्यावर येऊ असे सांगितले असले तरी निश्चितपणे कधी दौरा करणार हे निश्चित नाही.

राष्ट्रवादी कॉंग्रेसचे प्रदेश पातळीवरील नेते काही वैयक्तिक कामांनिमित्त मुंबईत होते. त्यांनी कामे आटोपल्यानंतर पवार व पटेल यांची भेट मिळते का, याची चाचपणी केली. भेटीनंतर राज्यातील राजकीय घडामोडींचा लेखाजोखा त्यांनी मांडला.

पक्षाने उत्तर गोव्यावर भर देण्याचे ठरवले आहे. त्याशिवाय मगो, फॉरवर्ड व कॉंग्रेसशी सुरू असलेल्या चर्चेविषयी माहिती दिली. 11 वाजता पवार यांची तर पटेल 4 वाजता भेटले. दोघांनी राष्ट्रवादी कॉंग्रेसकडे पर्यायी आराखडा तयार असल्याबाबत आश्वस्त केले.

- संजय बर्डे, सरचिटणीस

राष्ट्रवादी कॉंग्रेसच्या वरिष्ठ नेत्यांची भेट झाली. विधानसभा निवडणूक लढवण्यासाठी पक्ष पुरेसा गंभीर आहे. त्याची पूर्वतयारी करण्याचे आदेशही देण्यात आले आहेत.

- जुझे फिलिप डिसोझा, प्रदेशाध्यक्ष, राष्ट्रवादी कॉंग्रेस