पणजी: राज्यात सध्या उन्हाळ्याच्या सुट्ट्या सुरू असून नवीन शाळा आणि उच्च माध्यमिक विद्यालयाचे नवीन शैक्षणिक वर्ष ६ जूनपासून सुरू होणार आहे.

शाळा सुरू होण्यासाठी आता अवघेच दिवस राहिल्याने सुट्टीसाठी परगावी, परराज्यात गेलेले पालक आणि विद्यार्थी आता पुन्हा घरी परतू लागले आहेत.

महाविद्यालयीन आणि गोवा विद्यापीठाचे नवीन शैक्षणिक वर्ष हे १९ जूनपासून सुरू होणार आहे. शाळांचे पहिले सत्र हे १ एप्रिल ते १० ऑक्टोबर तर महाविद्यालयाचे १९ जून ते १४ ऑक्टोबर असणार आहे.

शालेय साहित्य दरात १५ टक्क्यांनी वाढ

शाळा सुरू होण्याची तारीख जवळ आल्याने राज्यातील बाजारपेठांमध्ये शालेय साहित्य दाखल झाले आहे. गणवेश, दप्तर (बॅग), वह्या, पुस्तके, रेनकोट आणि छत्री खरेदी करण्यासाठी पालक मुलांसह दुकानांमध्ये जाताना दिसत आहेत. वाढत्या महागाईमुळे यंदा शालेय साहित्याच्या किमतीत १० ते १५ टक्क्यांनी वाढ झाल्याचे विक्रेते सांगतात.