पणजी: गेल्या काही काळापासून नववीचे पेपर बोर्डाकडून काढले जात असल्यामुळे विद्यार्थ्यांमध्ये निर्माण झालेली भीती आणि तणाव लक्षात घेऊन गोवा बोर्डाने मोठा बदल केलाय. २०२५-२६ च्या वार्षिक परीक्षेपासून नववीचे प्रश्नपत्रिका तयार करण्याचे स्वातंत्र्य शाळांना पुन्हा देण्यात आले आहे. बोर्डाचे अध्यक्ष भगीरथ शेट्ये यांनी या निर्णयाची अधिकृत घोषणा केली असून, यामुळे विद्यार्थी आणि पालकांना मोठा दिलासा मिळाला आहे.

निर्णयामागची प्रमुख कारणे

१. विद्यार्थ्यांवरील ताण: बोर्डाने पेपर काढण्यास सुरुवात केल्यापासून विद्यार्थी प्रचंड दडपणाखाली होते. बोर्डाच्या पेपरच्या भीतीने अनेक विद्यार्थी महागड्या कोचिंग क्लासेसकडे वळले होते. स्वतःचे शिक्षक पेपर काढणार असल्यामुळे आता विद्यार्थ्यांवरील हे ओझे कमी होईल.

२. शिक्षकांचे प्रशिक्षण: यापूर्वी केवळ काही मोजक्याच शिक्षकांना बोर्डाचे पेपर काढण्याची संधी मिळत होती. आता शाळांना अधिकार मिळाल्यामुळे सर्व शिक्षकांना प्रश्नपत्रिका तयार करण्याचे कौशल्य आत्मसात करता येईल.

कसा असेल नवा नियम?

• मार्गदर्शक तत्वे: शाळांना पेपर काढण्याचे स्वातंत्र्य दिले असले, तरी त्यांना बोर्डाने दिलेल्या 'ब्लूप्रिंट'नुसारच प्रश्नपत्रिका तयार करावी लागेल.

• क्लस्टर तपासणी: तालुका स्तरावर ८ 'क्लस्टर' (गट) तयार करण्यात आले आहेत. शाळांनी तयार केलेले पेपर या क्लस्टरमधील अनुभवी शिक्षकांकडून तपासले जातील. जर एखाद्या शाळेचा पेपर निकृष्ट दर्जाचा आढळला, तर संबंधित शिक्षकांना प्रशिक्षण दिले जाईल.

• मार्क्स आणि पोर्टल: उत्तरपत्रिकांची तपासणी शाळांचे शिक्षकच करतील आणि मिळालेले गुण बोर्डाच्या अधिकृत पोर्टलवर अपलोड केले जातील.

बोर्डाची 'करडी नजर' कायम जरी शाळा पेपर काढणार असल्या, तरी परीक्षेचे वेळापत्रक मात्र गोवा बोर्डच देणार आहे. परीक्षेच्या काळात बोर्डाची भरारी पथके शाळांना भेटी देऊन नियमांचे पालन होत आहे की नाही, याची खात्री करतील. तसेच, शाळांनी काढलेले उत्कृष्ट दर्जाचे पेपर बोर्डाच्या 'क्वेश्चन बँक'मध्ये समाविष्ट केले जातील, ज्याचा उपयोग भविष्यात इतर शाळांना सरावासाठी करता येईल.