मडगाव: कामावर निघताना आपल्या दीड वर्षीय बालकाला शेजाऱ्याकडे ठेवलेल्या पालकांना काही तासांतच आपल्या चिमुकल्याचा मृतदेह पाहावा लागल्याची हृदयद्रावक घटना तळेबांद, बाणावली येथे सकाळी साडे अकराच्या सुमारास घडली. इरहान शेख असे या बालकाचे नाव आहे.

घराच्या आवारात खेळत असताना जवळच्या तळ्यात पडून इरहानचा बुडून मृत्यू झाल्याची माहिती कोलवा पोलिसांनी दिली. या प्रकरणाची नोंद अनैसर्गिक मृत्यू म्हणून करण्यात आली असून, मृतदेह शवचिकित्सेसाठी दक्षिण गोवा जिल्हा इस्पितळाच्या शवागारात ठेवण्यात आला होता.

पोलिसांनी दिलेल्या माहितीनुसार, इरहानचे पालक हे मजूर असून तळेबांद परिसरात वास्तव्यास आहेत. नेहमीप्रमाणे ते कामावर जात होते, त्यांनी बालकाला शेजाऱ्याकडे ठेवले. या घराच्या पाठीमागे एक तळे आहे. दुपारी झोपेतून उठल्यानंतर हा बालक खेळता-खेळता तळ्याकडे गेला व त्यात पडून बुडाला.

बालक बेपत्ता झाल्याचे लक्षात येताच परिसरात शोधमोहीम सुरू करण्यात आली. काही वेळानंतर इरहानचा मृतदेह तळ्यात आढळून आला. शवचिकित्सेनंतर बुडून मृत्यू झाल्याचे स्पष्ट झाले असून, मृतदेह नंतर कुटुंबीयांच्या स्वाधीन करण्यात आला.

दरम्यान, पोलिस निरीक्षक विक्रम नाईक यांच्या मार्गदर्शनाखाली उपनिरीक्षक अनिल कृष्णा यांनी घटनास्थळी पंचनामा केला आहे.