गोव्याला (Goa) दिल्ली मॉडेलची (Delhi Model) गरज नाही. उलट गोव्यातील सामाजीक विकासाच्या योजनांचे मॉडेल दिल्ली सरकारने राबवावे. तेथील ज्येष्ठ नागरिक, दिव्यांग व विधवा यांच्यासाठी दयानंद सामजिक सुरक्षा योजना, कलाकारासाठी कलासन्मान योजना, गृहिनीसाठी गृह आधार योजना व मुलीसाठी लाडली लक्ष्मी योजना सुरु कराव्यात. असे प्रतिपादन भारतीय जनता पक्षाचे गोवा प्रदेश अध्यक्ष सदानंद शेट तानावडे (Sadanand Shet Tanawade) यांनी केले आहे.

एका वत्तवाहिनीशी बोलताना तानावडे म्‍हणाले की गोव्यात ज्या ज्या वेळी भाजपचे सरकार आले त्या त्या वेळी समाजातील विविध घटकांच्या विकासाच्या योजनां सुरु करण्यात आल्या. वरील सामाजीक योजना माजी मुख्यमंत्री मनोहर पर्रीकर यांनी सुरु केल्या. तसेच अनेक विकास प्रकल्पही भाजपच्या सरकारने पुर्वी उभे केले व आत्ताही उभे करत आहे. त्यामुळे दिल्ली मॉडेलची गोव्याला गरज नाही. विविध योजनांच्या माध्यमातून घरोघरी सरकारी मदत पोचते. असे सांगून भाजप म्हणजे जनहित व गोव्याचा विकास! हे ठरुन गेल्याचे तानावडे यांनी दिल्ली मॉडेलची गोव्याला गरज आहे का? या प्रश्‍नावर बोलताना सांगितले.

आपण किवा आपला पक्ष विरोधकांना कधीच कमी लेखत नाही. विरोधकांनी सरकारच्या चुका अवश्‍य दाखवाव्यात मात्र नसलेल्या चुका सरकारच्या माथी मारु नयेत. सकारात्मक राजकारणाला आम्ही नेहमीच प्रोत्साहन दिल्याचे तानावडे एका प्रश्‍नावर बोलताना म्हणाले. भुमीपूत्र विधेयक असो वा इतर कुठलेही विधेयक असो. विरोधकांनी सभात्याग न करता सभागृहात उपस्थित राहून चर्चेच भाग घेणे गरजेचे होते. मात्र विरोधकांनी महत्वाच्या विधेयकावरील चर्चेत भाग न घेता सभात्याग केला. याला सरकार जबाबदार कसे? असा प्रश्‍न तानावडे यांनी भुमीपुत्र विधेयकावर चर्चा न झाल्याच्या प्रश्‍वावर बोलताना उपस्थित केला. तानावडे यांनी इतर विविध विषयावरील प्रश्‍नावरही उत्तरे दिली. भाजप निवडणुकीसाठी नेहमीच सज्ज असतो. सध्या चालू असलेल्या दौऱ्यांना मिळणारा प्रतिसाद पाहता. येत्या निवडणुकीनंतर पुन्हा भाजपचेचेच सरकार सत्तेवर असेल असेही त्यांनी सांगितले.