अन्न आणि औषध प्रशासन संचालनालयाने औषध आणि सौंदर्य प्रसाधन कायदा १९४० च्या कलम कलम २६ अ अंतर्गत अधिसूचना जारी करत भारतातील १५६ फिक्स्ड डोस संयोजन (एफडीसी) औषधांवर मानवी वापरासाठी विक्रीसाठी उत्पादन करणे किंवा वितरण करणे यावर तात्काळ प्रभावाने बंदी घालण्याचा निर्णय घेतला आहे.

तज्ज्ञ समिती आणि औषध तांत्रिक सल्लागार मंडळ (डीटीएबी) यांच्या समितीच्या अहवालाच्या शिफारशीनुसार ही बंदी घालण्यात आल्याची माहिती एका प्रसिध्दीपत्रकात देण्यात आली आहे. या समितीच्या अहवालात या औषधांमुळे रूग्णांच्या आरोग्यावर प्रतिकूल परिणाम होऊ शकतो. त्यामुळे या औषधांवर बंदी घालण्यात यावी, अशी शिफारस करण्यात आली आहे. त्यामुळे अशा औषधांवर बंदीचा निर्णय घेण्यात आला आहे.

या पार्श्वभूमीवर राज्यभरातील औषधांचे किरकोळ विक्रेते, घाऊक विक्रेते, उत्पादक, सरकारी इस्पितळे/जिल्हा इस्पितळे/यूएचसी/पीएचसी/आरोग्य सेवा संचालनालयाखालील दवाखाने, गोमेकॉ, गोवा नर्सिंग होम्स, गोवा मेडिकल कौन्सिल/आयएमए तसेच नोंदणीकृत वैद्यकीय व्यावसायिकांनी या बंदीची नोंद घ्यावी, असे कळविले आहे. तसेच बंदी घातलेल्या औषधांची यादी www.goa.gov.in वर अपलोड केली आहे.