Lumpy Virus: धारबांदोडा पंचायत क्षेत्रात धावकोण येथे गुरांच्या अंगावर बारीक पुरळ आल्याने त्यांना लंपी विषाणूची लागण होण्याची शक्यता असून एका संशयास्पद गुराचे धारबांदोडा पशुवैद्यकीय अधिकारी डॉ. रामा परब यांनी मोले येथील डॉ. केतन यांच्या साहाय्याने नमुने घेऊन चाचणीसाठी पाठवून दिले आहेत.

मिळालेली माहितीनुसार, दोन दिवसांपूर्वी धावकोण गावातील पाळीव गाय बेशुद्धावस्थेत दूधसागर नदीच्या काठावर पडली होती. त्याची माहिती स्थानिक पंच गुरू गावकर यांनी धारबांदोडा पशुवैद्यकीय अधिकारी डॉ. रामा परब यांना कळविली.

त्यावेळी डॉ. परब यांनी लगेच घटनास्थळी येऊन तपासणी केली व इंजेक्शन दिले. काल मोले येथील डॉ. केतन यांच्या साहाय्याने एका गुराला पकडून त्याचे नमुने चाचणीसाठी पाठवून दिले आहेत.

डॉ. रामा परब, पशुवैद्यकीय अधिकारी-

आम्ही जाऊन संशयास्पद अशा एका गुराचे नमुने घेतले असून चाचणीसाठी पाठविले आहेत. यासंदर्भात स्थानिक पंचायत, आमदारांनाही कळविले आहे.

बालाजी गावस, सरपंच, धारबांदोडा-

गुरांसाठी शेड बांधण्यास पंचायतीकडे निधी नाही. त्यामुळे आम्ही जागा देतो, तेथे शेड बांधून संशयास्पद गुरांना ठेवावे, असे आम्ही पशुवैद्यकीय खात्याच्या डॉक्टरांना कळविले आहे.