मडगाव : झालोर केळशी येथील समुद्र किनाऱ्यावर गांजा विकायला आलेल्या गणेश गंगाधर दासुर (21) या तरुणाला सोमवारी (20 डिसेंबर) रात्री कोलवा पोलिसांनी सापळा रचून अटक केली.

आरोपी तरुण मूळचा हावेरी कर्नाटक येथील असून तो चिंचोणे येथे राहत होता अशी माहिती कोलवाचे पोलीस निरीक्षक तुकाराम चव्हाण यांनी दिली. आरोपीकडून अंदाजे दीड लाख रुपये किमतीचा 1.90 किलो गांजा पकडण्यात आला. सोमवारी रात्री 10 ते 10.30 च्या दरम्यान ही कारवाई (Arrest) करण्यात आली.

सदर युवक गांजा विकायला समुद्र किनाऱ्यावर येणार याची माहिती मिळाल्यावर कोलवा पोलिसांनी सापळा रचून ठेवला होता. रात्री तो गाडीने किनाऱ्यावर आला असता पोलिसांच्या तावडीत सापडला. मंगळवारी आरोपी तरुणाला न्यायालयासमोर हजर केले असता दोन दिवसांच्या पोलीस कोठडीचा रिमांड (Arrest) देण्यात आला.