Goa Crime: पर्वरी येथील एका खासगी फर्ममध्ये अकाऊंट असिस्टंट म्हणून कार्यरत असलेल्या एकाने मालकाच्या विश्वासाचा गैरफायदा घेत त्याला चक्क २३ लाख रूपयांचा गंडा घातला आहे. या प्रकरणी पोलिसांत गुन्हा नोंद झाला आहे.

ग्रीन हिल्स, सुकूर येथील क्रिएटिव्ह आंत्रप्रेन्युअरचे मालक हुकुमपाल देवेंद्र सोलंकी (वय ३७) यांनी पर्वरी पोलिसांत याबाबत तक्रार दाखल केली आहे.

त्यात म्हटले आहे की, आरोपी सुसंता कुमार बाबाजी गोछायत (वय ४३, रा. ओडिशा) हा त्यांच्याकडे अकाउंट असिस्टंट म्हणून काम करत होता आणि त्याच्याकडे ही जबाबदारी सोपवण्यात आली होती. स्थानिक गरजांसाठी पैसे वितरित करण्याचे काम त्याला दिले होते.

पण विश्वास असल्याचा गैरफायदा घेत गोछायत याने 23 लाख रुपयांचा गैरव्यवहार केला आहे. त्याने विश्वासघात केला आहे.

आरोपी गोछायत हा काही दिवसांपूर्वीच ओडिशामध्ये त्याच्या मूळ गावी गेला होता आणि तो परत न आल्याने आणि त्याने फोन कॉलला प्रतिसाद देत नसल्यामुळे, सोळंकी यांना काहीतरी चुकीचे घडले असल्याचा संशय आला.

त्यांनी तपासणी केल्यावर त्यांना ही फसवणूक झाल्याचे लक्षात आले.

दरम्यान, पोलिसांनी याप्रकरणी भादंवि कलम ४०८ अन्वये गुन्ह्याची नोंद केली असून पोलीस निरीक्षक राहुल परब यांच्या मार्गदर्शनाखाली पीएसआय सीताराम मलिक तपास करीत आहेत.