म्हापसा: पत्नी वारंवार पैसे मागते, म्हणून संतापलेल्या पतीने सुरीने निर्घृणपणे तिचा गळा कापून खून केल्याचा धक्कादायक प्रकार मुड्डोवाडो-साळगाव येथे आज घडला. मृत महिलेचे नाव रुक्मिणी राठोड (वय ३६ वर्षे) असे असून, विनोद भालचंद्र राठोड (वय ४० वर्षे) असे पतीचे नाव आहे. ही घटना मुड्डोवाडो-साळगाव येथे भाड्याच्या खोलीत राहणाऱ्या मूळ गदग (कर्नाटक) येथील कुटुंबात घडली.

ही घटना मुड्डोवाडो-साळगाव येथे भाड्याच्या खोलीत राहणाऱ्या मूळ गदग (कर्नाटक) येथील कुटुंबात घडली. पत्नी रुक्मिणी हिच्या गळ्यावर सुरीचा वार करून आणि गळा आवळून खून केल्याप्रकरणी साळगाव पोलिसांनी पती विनोद याला अटक केली आहे. ही घटना (शुक्रवारी) दुपारी १.४५ च्या सुमारास उघडकीस आली. प्रत्यक्ष खुनाची घटना सकाळी ११.३० च्या सुमारास घडली होती. खून केल्यानंतर संशयित विनोद हा आपल्या १२ वर्षीय मुलासोबत साळगाव पोलिस ठाण्यात आला आणि त्याने आपण पत्नीचा खून केल्याची कबुली दिली.

रुक्मिणी ही विनोदकडे वारंवार पैशांची मागणी करत होती. त्यामुळे तिच्या या प्रकाराला कंटाळून विनोदने रागाच्या भरात तिच्या गळ्यावर सुरीने वार केला. नंतर जखमी अवस्थेतच तिचा गळा आवळला आणि तिला ठार केले. या घटनेची माहिती मिळताच साळगावचे पोलिस निरीक्षक दिनेश गडेकर आणि सहकाऱ्यांनी घटनास्थळी धाव घेतली. संशयिताने पत्नीच्या मृतदेहावर चादर घातली होती. नंतर पोलिस अधीक्षक विश्वेश कर्पे आणि हरिश्चंद्र मडकईकर यांनी घटनास्थळी भेट दिली.

खोली सोडण्यासाठी मालकाचा तगादा

विनोद हा सात-आठ महिन्यांपूर्वी गावी गेला होता. आठच दिवसांपूर्वी तो खोलीवर आला होता. तेव्हापासून रुक्मिणी त्याच्याकडे पैशांची मागणी करत होती. त्यावरून त्यांच्यात वारंवार खटके उडत होते. नेहमीच्या भांडणामुळे घरमालकाने त्यांना खोली सोडण्यास सांगितले होते. येत्या एक तारखेपासून ते दुसरीकडे राहायला जाणार होते. तत्पूर्वीच संशयिताने रागातून पत्नीचा खून केला.

थंड डोक्याने केले कृत्य

राठोड कुटुंबीयांच्या शेजारी दोन खोल्यांमध्ये भाडेकरू राहतात. मात्र, त्यांना कोणतीही चाहूल लागू न देता संशयिताने थंड डोक्याने हे कृत्य केले. नंतर गंभीर जखमी अवस्थेतील पत्नीला खोलीतच टाकून विनोद मुलांना आणण्यासाठी शाळेत गेला. प्रथम त्याने आपल्या दोन्ही मुलींना आणून मेहुणीच्या घरी नेऊन सोडले. नंतर तो लहान मुलाला शाळेतून घेऊन थेट पोलिस ठाण्यात पोचला.