पणजी: गोव्यातील ओल्ड गोवा परिसरातून एक धक्कादायक बातमी समोर आली आहे. रविवारी (दि.२४) सकाळी रस्त्याच्या कडेला एका तरुणाचा मृतदेह आढळल्याने परिसरात मोठी खळबळ उडाली आहे. या घटनेची माहिती मिळताच पोलीस घटनास्थळी दाखल झाले असून, त्यांनी तपास सुरू केला आहे.

मिळालेल्या माहितीनुसार, मृतदेहाजवळ काही बॅगा आणि वैयक्तिक वस्तू पडलेल्या होत्या. तसेच, मृतदेहावर जखमांच्या खुणाही दिसत असल्याचे सूत्रांनी सांगितले. त्यामुळे हा अपघात आहे की घातपात, याबाबत संशय व्यक्त केला जात आहे.

या घटनेची माहिती मिळताच, पोलिसांनी तातडीने घटनास्थळी धाव घेऊन पंचनामा केला. मृतदेह शवविच्छेदनासाठी पाठवण्यात आला असून, शवविच्छेदन अहवाल आल्यानंतरच मृत्यूचे खरे कारण स्पष्ट होईल. सध्या पोलीस वेगवेगळ्या दिशेने तपास करत आहेत आणि अधिक माहितीची प्रतीक्षा आहे.

13 वर्षीय भाच्याला 10 वेळा चाकूनं भोसकलं

नात्यातील विश्वासाला काळिमा फासणारी एक हृदय पिळवटून टाकणारी घटना छत्तीसगडमधील बिलासपूर जिल्ह्यातून समोर आली होती. येथील एका 13 वर्षीय मुलावर त्याच्याच कथित मामाने चाकूने जीवघेणा हल्ला केला. आरोपीने मुलावर तब्बल 10 वेळा चाकूने वार केले आणि तो मेला असे समजून त्याला झुडुपांमध्ये फेकून पळ काढला. मात्र, प्रसंगावधान राखत या चिमुकल्याने दाखवलेली हिंमत त्याच्या आयुष्याची ढाल ठरली. संपूर्ण घटना बिलासपूर जिल्ह्यातील मस्तुरी पोलीस ठाण्यांतर्गत येणाऱ्या बटाही पुलाजवळ घडली.