फोंड्यात कामानिमित्त आलेल्या मध्यप्रदेश येथील मजुरांच्या टोळक्यात राडा झाला आहे . या वादात एकावर कोयत्याने वार करण्याचा प्रकार घडला असून जखमीची प्रकृती चिंताजनक आहे. संशयित हल्लेखोराला फोंडा पोलिसांनी अटक केली आहे. ही घटना परवा रात्री अकराच्या सुमारास घडली. या हल्ल्यात मूळ मध्यप्रदेश येथील पण सध्या बांदोडा काशीमठ मैदानाजवळील खोलीत राहणारा महेशसिंग लोधी हा गंभीर जखमी झाला आहे तर हल्लेखोर मूळ मध्यप्रदेश येथील पण बांदोड्यात त्याच ठिकाणी राहणाऱ्या फुलसिंग याला अटक करण्यात आली आहे.(Goa Crime Fighting in two groups in Ponda)

मध्यप्रदेश राज्यातून काल अकराजणांचा मजुरांचा गट फोंड्यात कामाच्या शोधात आला होता. या अकराही जणांना बांदोडा काशीमठ मैदानाजवळील एक खोली येथील एका घरमालकाने भाडेपट्टीवर दिली. याच ठिकाणी दुसऱ्या खोलीत मूळ मध्यप्रदेश येथील पण चार महिन्यांपूर्वी गोव्यात आलेला फुलसिंग हा भाड्याच्या खोलीत राहत होता.