पणजी: गोवा पोलिसांच्या गुन्हे शाखेने एका मोठ्या फसवणुकीच्या प्रकरणाचा छडा लावत राज्य प्रदूषण नियंत्रण मंडळाचा अधिकारी असल्याचे भासवून लाखो रुपये लुटणाऱ्या सराईत गुन्हेगाराला पुण्यातून अटक केली. सुरज विवेक पेंडसे असे अटक करण्यात आलेल्या आरोपीचे नाव आहे. सरकारी अधिकाऱ्याचे बनावट रुप धारण करुन सर्वसामान्य नागरिकांची फसवणूक करणाऱ्या या आरोपीने एका तक्रारदाराला तब्बल 5.03 लाख रुपयांचा चुना लावल्याचे तपासात उघड झाले.

आरोपी सुरज पेंडसे याने तक्रारदाराशी संपर्क साधून आपण गोवा राज्य प्रदूषण नियंत्रण मंडळाचा अधिकारी असल्याचे खोटे सांगितले होते. मंडळाशी संबंधित विविध कामांसाठी त्याने तक्रारदाराकडून वेळोवेळी पैसे उकळले. विश्वास संपादन करण्यासाठी त्याने चक्क प्रदूषण नियंत्रण मंडळाची बनावट संमती पत्रे आणि पावती पुस्तके तयार केली होती. ही बनावट कागदपत्रे तक्रारदाराला देऊन त्याने सर्व कामे अधिकृतपणे पूर्ण झाल्याचा आभास निर्माण केला. मात्र, या कागदपत्रांची पडताळणी केली असता ही सर्व कागदपत्रे आणि पावत्या बनावट असल्याचे समोर आले, ज्यानंतर तक्रारदाराने पोलिसांत धाव घेतली.

गुन्हे शाखेने या प्रकरणाचा तांत्रिक तपास सुरु केला असता आरोपी पुण्यात लपून बसल्याची माहिती मिळाली. त्यानुसार सापळा रचून त्याला ताब्यात घेण्यात आले. तपासादरम्यान पोलीसही थक्क झाले, कारण सुरज पेंडसे हा केवळ या एकाच प्रकरणापुरता मर्यादित नव्हता. त्याच्याविरोधात गोव्यात अशाच प्रकारच्या फसवणुकीचे आठ गुन्हे दाखल असून गोव्याबाहेर इतर राज्यांमध्येही दोन गुन्हे नोंदवण्यात आले आहेत. सरकारी यंत्रणेच्या नावाचा गैरवापर करुन बनावट शिक्के आणि लेटरहेड तयार करण्यामध्ये हा आरोपी माहीर असल्याचे पोलिसांचे म्हणणे आहे.

प्रदूषण नियंत्रण मंडळासारख्या महत्त्वाच्या विभागाच्या नावाचा वापर करुन अशा प्रकारे फसवणूक होणे ही गंभीर बाब मानली जात आहे. सध्या गुन्हे शाखा या आरोपीकडून अधिक माहिती मिळवण्याचा प्रयत्न करत असून या रॅकेटमध्ये आणखी कोणाचा सहभाग आहे का, याचाही तपास केला जात आहे. या अटकेमुळे सरकारी कामांच्या नावाखाली फसवणूक करणाऱ्या टोळ्यांना मोठा इशारा मिळाला असून नागरिकांनी कोणत्याही सरकारी कामासाठी अधिकृत कार्यालयात जाऊनच व्यवहार करावा, असे आवाहन प्रशासनाकडून करण्यात येत आहे.