Goa police: बार्देशातील हणजूण-वागातोर तसेच किनारी परिसरात आढळलेल्या ड्रग्स प्रकरणांमुळे गोव्याची प्रतिमा मलीन होत आहे. परिणामी दोषींवर कडक कारवाईचे निर्देश मुख्यमंत्र्यांकडून पोलिस यंत्रणेला मिळाले आहेत. त्यामुळे गैरकृत्यांत सहभागींची गय केली जाणार नाही.

यासंबंधी किनारी भागात व्यवसाय थाटलेल्या गोमंतकीय तसेच परप्रांतीय हॉटेल व्यावसायिकांनी पोलिसांना सहकार्य करावे, असे आवाहन म्हापसा पोलिस उपअधीक्षक जीवबा दळवी यांनी केले.

हणजूण पोलिस स्थानकात परिसरातील हॉटेल्सचे मालक, चालक तसेच व्यवस्थांपकांसोबत घेतलेल्या विशेष बैठकीत उप-अधीक्षक जीवबा दळवी बोलत होते. यावेळी, हणजुण पोलिस स्थानकाचे निरीक्षक प्रशाल देसाई तसेच उप- निरीक्षक साहील वारंग आणि झेवियर फ्रान्सिस उपस्थित होते.

आपल्या हॉटेल वा रिसॉर्टमध्ये नेमके कुठल्या प्रकारचे अतिथी येतात, त्यांना कोण कोण भेटतात. तसेच त्यांच्या इतर हालचालींवर हॉटेल व्यवस्थापनाचे लक्ष असणे आवश्यक आहे. सीसीटीव्ही द्वारे नजर ठेवावी, असेही दळवी म्हणाले.

सूचकांची माहिती गुप्त राहील!

‘नो- ड्रग्स’ चे फलक तसेच भित्तीपत्रके उपस्थित हॉटेल चालकांकडे देत प्रत्येकाने तशी भित्तीपत्रके आपापल्या हॉटेल अथवा रिसॉर्टमध्ये लावावीत, असे पोलिस उपअधीक्षक जीवबा दळवी यांनी सांगितले.

यावेळी हणजूण पोलिस स्थानकाचे निरीक्षक प्रशाल देसाई यांनी सांगितले, की परिसरात चोरीछुपे चाललेल्या ड्रग्स व्यवहारासंबंधी जो कुणी पोलिस यंत्रणेना सुचित करेल, त्यांची माहिती पूर्णपणे गुप्त ठेवली जाईल.