Goa Tourism: पर्यटन हंगामात विठ्ठलदासवाडा, मोरजी किनारी भागात मोठ्या प्रमाणात बिगर गोमंतकीय व्यावसायिकांनी पर्यटन खात्याकडून कसल्याच प्रकारचे परवाने न घालता घेता शेकडो लाकडी पलंग टेबल्स घालून किनाऱ्यावर अतिक्रमण केले आहेत.

या अतिक्रमणावर कारवाई केल्यानंतर लगेच त्यांचे पलंग परत कसे केले जातात? या प्रकारावर कडक कारवाई करावी, अशी स्थानिकांची मागणी आहे.

मोरजी पंचायत क्षेत्रातील किनारी भागात सध्या विठ्ठलदासवाडा या ठिकाणी खाजगी जमिनीमध्ये रेस्टॉरंट क्लब उभारलेले आहेत.

या रेस्टॉरंट क्लबसाठी किनाऱ्यावर लाकडी पलंग घालण्यासाठी पर्यटन खात्याकडून परवाने घेणे आवश्यक असते आणि पर्यटन खाते केवळ या व्यावसायिकांना पाच जोड्या लाकडी पलंग घालण्यासाठी मुभा देते.

किनारी भागावर जे शॅक व्यावसायिक पर्यटन खात्याकडून परवाने देऊन व्यवसाय करतात, त्यांना मात्र दहा जोड्या, एकूण वीस लाकडी पलंग घालण्याची मुभा असते.

खाजगी जागेतील शॅक व्यावसायिक, रेस्टॉरंट व्यावसायिकांनी शेकडो विनापरवाना लाकडी पलंग घालून किनारा व्यापून टाकलेला आहे. सायंकाळी दुपारी पर्यटक जर समुद्रकिनाऱ्यावर समुद्राच्या पाण्यात आपला वेळ घालवण्यासाठी जात असेल, तर त्यांनाही लाकडी पलंग अडचणी ठरत आहे.

...कारवाईची गरज!

लाकडी पलंगावर दोन वेळा पर्यटन खात्याने कारवाई केली होती, परंतु त्यानंतर लगेच हे लाकडी पलंग व्यावसायिकांना घरपोच केले. हा प्रकार वारंवार कसा काय घडतो, या पर्यटन खात्याच्या अधिकाऱ्यावर राजकीय दबाव आहे की काय?

अशी शंका स्थानिकांकडून उपस्थित केली जात आहेत. शेकडो लाकडी पलंग घालून अतिक्रमण करणाऱ्या व्यावसायिकावर कारवाई का नाही? असा सवाल ग्रामस्थ संजय कोले यांनी केली आहे.