Goa Congress: मडगाव पालिकेचे माजी नगराध्यक्ष सॅव्हियो कुतिन्हो यांनी त्यांच्या समर्थकांसह आज, मंगळवारी काँग्रेसमध्ये प्रवेश केला. पुढील वर्षात लोकसभा निवडणूक होणार आहे. त्या पार्श्वभूमीवर कुतिन्हो यांच्या प्रवेशाने काँग्रेसला ताकद मिळाली आहे.

यावेळी दक्षिण गोव्याचे खासदार फ्रान्सिस्को सार्दिन, काँग्रेसचे प्रदेशाध्यक्ष अमित पाटकर, विधानसभेतील विरोधी पक्षनेते युरी आलेमाव, आमदार कार्लुस फेरेरा, आमदार आल्टन डिकॉस्टा, दक्षिण गोवा जिल्हा काँग्रेसचे अध्यक्ष सॅव्हिडो डिसिल्वा, एम. के. शेख आदी उपस्थित होते.

यावेळी खासदार सार्दिन म्हणाले की, आज अनेक युवक बेरोजगार आहे. त्यांना नोकरी देण्याची गरज आहे. महागाई वाढली आहे. भाजपविरोधात सर्वसामान्यांमध्ये रोष आहे.

दरम्यान, काँग्रेस पक्षाची सेवा करण्याबाबतची बांधिलकी कुतिन्हो त्यांनी व्यक्त केली. गोव्याच्या स्वातंत्र्यानंतर गोव्याच्या भविष्याचा, कोकणी भाषेचा प्रश्न निर्माण झाला. हे दोन्ही प्रश्न काँग्रेस पक्षाने सोडवले. कोकणीला साहित्य अकादमीची मान्यता मिळवून दिली.

राजीव गांधींमुळे कोकणीला राज्यभाषेचा दर्जा मिळाला. गोव्यासाठी आणि गोंयकारपण जोपासण्यासाठी काँग्रेसने नेहमीच प्रयत्न केले, अशी भावना उपस्थितांनी व्यक्त केली.