Goa Congress complaint Against BJP

'विकसित भारत' च्या नावाखाली भाजप लोकसभा निवडणूक प्रचार करून आचारसंहितेचा भंग करीत असल्याची तक्रार गोवा काँग्रेसने निवडणूक आयोगाकडे केलीय.

काँग्रेसने भारतीय जनता पक्ष, मुख्यमंत्री प्रमोद सावंत, उत्तर गोवा खासदार आणि प्रदेशाध्यक्ष सदानंद शेट तानावडे यांच्याविरोधात तक्रार दाखल केली आहे. बुधवारी (दि.20) याबाबत तक्रार निवडणूक आयोगाकडे लेखी तक्रार करण्यात आलीय.

उत्तर गोव्यातील उमेदवाराचा प्रचार करण्यासाठी विकसित भारत कार्यक्रमाचा आणि राज्य यंत्रणेचा गैरवापर करत असल्याचा आरोप याद्वारे करण्यात आला आहे. निवडणूक आयोगाने 16 मार्च रोजी देशातील लोकसभा निवडणुकीची घोषणा केली, दुपारी तीन नंतर देशात आदर्श आचारसंहिता लागू झाली आहे.

दरम्यान, गोव्याचे मुख्यमंत्री प्रमोद सावंत उत्तर गोवा खासदार आणि प्रदेशाध्यक्ष सदानंद शेट तानावडे यांनी हणजूणे येथे प्रचारसभा घेऊन आदर्श आचारसंहिताचा भंग केल्याचा आरोप काँग्रेसने तक्रारीतून केला आहे.

एकदा निवडणूक आचारसंहिता लागू झाल्यानंतर, भाजप सरकार विकसित भारत मोहिमेसारखे कोणतेही प्रचारात्मक कार्यक्रम आयोजीत करु शकत नाही. भाजपचे स्कार्फ व टोप्या यांचा वापर सरकारी कार्यक्रमात होवू शकत नाही.

निवडणुक आयोगाने यावर त्वरित बंदी न घातल्यास आम्ही न्यायालयात दाद मागू असा इशारा कार्लोस फरेरा यांनी दिला.

2015 मध्ये भाजप सत्तेत आल्यानंतर पक्षांतराला प्रोत्साहन देऊन भाजपने केलेल्या लोकशाहीच्या हत्येविरुद्ध कॉंग्रेस लढत आहे. भारत जोडो यात्रा ही भारतातील प्रेम आणि एकता पसरवण्यासाठी होती आणि भारत जोडो न्याय यात्रा ही युवक, महिला, शेतकरी, उपेक्षित क्षेत्र आणि ओबीसी, एससी आणि एसटी यांना सक्षम करण्यासाठी आहे, असे अमित पाटकर म्हणाले.