SIR enumeration progress Goa: गोव्याच्या मुख्य निवडणूक अधिकारी आयएएस संजय गोयल यांनी दिलेल्या माहितीनुसार राज्यातील मतदार यादीच्या स्पेशल इंटेन्सिव्ह रिपोर्ट प्रक्रियेमध्ये मतदारांच्या गणनेचे काम यशस्वीरित्या पूर्ण झाले आहे. गोव्यात ९१ टक्क्यांहून अधिक गणनेचे फॉर्म गोळा करून त्यांचे डिजिटायझेशन करण्यात आले आहे.

आकडेवारी आणि वेळापत्रक

निवडणूक आयोगाच्या (ECI) सुधारित वेळापत्रकानुसार (३० नोव्हेंबर २०२५), गोव्याने सर्व पात्र मतदारांची गणना पूर्ण केली. गोव्यात एकूण ११,८५,०३४ मतदार आहेत, त्यापैकी १०,८४,९५६ गणनेचे फॉर्म गोळा करण्यात आले असून, हे प्रमाण ९१.५५ टक्के झालेय.

मसुदा यादी आणि हरकतींची प्रक्रिया

गोव्याची मसुदा मतदार यादी (Draft Electoral Roll) १६ डिसेंबर २०२५ रोजी प्रसिद्ध केली जाईल आणि यादी प्रसिद्ध झाल्यानंतर, मतदार १६ डिसेंबर २०२५ ते १५ जानेवारी २०२६ या दरम्यान हरकती आणि दावे दाखल करता येतील.

मुख्य निवडणूक अधिकारी संजय गोयल म्हणाले की, १६ डिसेंबर पासून निवडणूक नोंदणी अधिकारी (EROs) आणि सहायक निवडणूक नोंदणी अधिकारी (AEROs) असमाविष्ट (unmapped) मतदारांना नोटिसा जारी करतील. अधिकारी निर्धारित कालावधीत सुनावणी करतील, प्रकरणांची तपासणी करतील आणि दावे तसेच हरकतींवर निर्णय घेतील.

दावे आणि हरकतींची प्रक्रिया पूर्ण झाल्यानंतर गोव्याची अंतिम मतदार यादी १४ फेब्रुवारी २०२६ रोजी प्रसिद्ध केली जाईल, अशी माहिती गोयल यांनी दिली. भविष्यातील निवडणुकांपूर्वी अचूक आणि सर्वसमावेशक मतदार यादी सुनिश्चित करण्यासाठी, निवडणूक अधिकाऱ्यांनी मतदारांना आवाहन केले आहे की त्यांनी मसुदा यादीतील त्यांचे तपशील तपासावेत आणि दिलेल्या वेळेत कोणत्याही चुका किंवा हरकती असल्यास त्या नोंदवाव्यात.