Goa Pharma Company Fire: गोव्यातील होंडा येथील औद्योगिक वसातहतीत फार्मा कंपनीच्या एका गोदामाला बुधवारी मध्यरात्री भीषण आग लागली. या आगीत कंपनीचे लाखो रूपयांचे नुकसान झाले आहे.

ही आग इतकी भीषण होती की आग विझविण्यासाठी घटनास्थळी अग्निशमन दलाचे 8 बंब दाखल झाले होते. तरीही ही आग आटोक्यात आणण्यासाठी अग्निशमन दलाला सहा तास लागले. आगीचे नेमके कारण अद्याप स्पष्ट झालेले नाही.

पुनिस्का इंजेक्टेबल प्रा. लि. या फार्मा कंपनीचे हे गोदाम आहे. रात्री दोन वाजण्याच्या सुमारास ही आग लागल्याचे समजते. त्यानंतर अग्निशमन दलाला ही माहिती देण्यात आली. वाळपई, डिचोली येथील अग्निशमन दलाचे 8 बंब घटनास्थळी दाखल झाले होते.

अग्निशमन दलाने सहा तास प्रयत्न करून सकाळी 8.30 वाजण्याच्या सुमारास या आगीवर नियंत्रण मिळवले. ही कंपनी सलाईन आणि इतर वैद्यकीय साहित्य तयार करते. जेसीबी वापरून गोदामातील रसायनांची खोकी बाहेर काढली गेली.