Goa College of Arts building Leakage : राज्यातील एकमेव कला महाविद्यालयाचे ‘आर्ट’ बिघडले असून संपूर्ण इमारतीला घरघर लागली आहे. भिंतींना तडे गेले असून छताला गळती लागल्याने विद्यार्थ्यांना अक्षरशः पावसाच्या पाण्यात कलेचे धडे गिरवावे लागत आहेत. यापुढे अशा स्थितीत आपण शिकावे कसे,असा प्रश्‍न करून विद्यार्थ्यांनी बंडाचा पवित्रा घेतला आहे.

राज्यातील चित्र, शिल्प तसेच इतर विविध कलांची आवड असणारे विद्यार्थी आल्तिनो येथील कला महाविद्यालयात प्रशिक्षण घेतात. गोमंतकीय कलाकारांसाठी या महाविद्यालयाची इमारत म्हणजे कलेचे मंदिर आहे.

परंतु ही इमारत जीर्णावस्थेत असून छताचे प्लास्टर गळत असल्याने ही इमारत धोकादायक आहे. या वास्तूचे नूतनीकरण करावे किंवा नवी वास्तू उभारावी, अशी मागणी विद्यार्थ्यांकडून होत आहे. या इमारतीच्या भिंतीदेखील जीर्ण झाल्याने सततची मनात भीती असते. त्यामुळे शासनाने योग्य ते सोपस्कार पूर्ण करत इमारतीची डागडुजी करावी, असे विद्यार्थ्यांचे मत आहे.

शौचालयांची दुरवस्था

महाविद्यालयातील शौचलयांची देखील दुरवस्था झाली असून त्यांच्या डागडुजीची गरज आहे. महाविद्यालयात अनेक समस्या भेडसावत असल्याचे विद्यार्थ्यांनी सांगितले.

"मी या महाविद्यालयाच्या प्राचार्यपदाचा कारभार काही महिन्यांपूर्वीच स्वीकारला आहे. तरी देखील गेल्यावर्षीच्या तुलनेत यंदाची महाविद्यालयाची स्थिती चांगली आहे कारण महाविद्यालयाची काहीप्रमाणात डागडुजी करण्यात आली आहे. येत्या काळात महाविद्यालयाच्या विविध समस्या कशा सोडविता येतील यावर तोडगा काढणार आहे."

- विल्फिड गोईश, प्राचार्य, कला महाविद्यालय.