Goa CM Watches Solar Eclipse: सन 2022 या वर्षातील अखेरचे सूर्यग्रहण मंगळवारी पाहता आले. जगभरातील अनेक देशांमध्ये हे सूर्यग्रहरण दिले. दरम्यान, गोव्यामध्येही मुख्यमंत्री डॉ. प्रमोद सावंत यांनी हे सूर्यग्रहण पाहण्याचा आनंद लुटला.

देशभरात पुर्वेकडील कोलकातापासून पश्चिमेकडील मुंबईपर्यंतच्या विस्तृत भागात हे सूर्यग्रहण दिसले. गोव्यात मिरामार समुद्रकिनारी विज्ञानप्रेमींनी हे सूर्यग्रहण पाहण्यासाठी गर्दी केली होती. यावेळी गोव्याचे मुख्यमंत्री डॉ. प्रमोद सावंत यांनीही काही काळ येथे ग्रहण पाहण्यासाठी हजेरी लावली. त्यांनी सर्वांसमवेत खास ग्रहण पाहण्यासाठी असलेल्या विशेष चष्म्यातून हे ग्रहण पाहण्याचा आनंद घेतला.

येथे लावण्यात आलेल्या दुर्बिणीतूनही त्यांनी काही काळ सूर्यग्रहणाचे निरीक्षण केले. यावेळी अनेक विज्ञानप्रेमी नागरिक निसर्गाचा हा रम्य सोहळा पाहण्यासाठी मिरामार समुद्रकिनारी उपस्थित होते. भारतात साधारण 4 वाजून 19 मिनिटांनी हे ग्रहण दिसण्यास सुरूवात झाली होती. तेव्हापासून ते सूर्यास्तापर्यंत हे ग्रहण भारतातून दिसले.

ऐन दिवाळी सणात हे सूर्यग्रहण होत असल्याने अनेकांनी सूर्यग्रहण सुटल्यानंतर नद्यांमध्ये अंघोळ केली. दरम्यान, या सूर्यग्रहणानंतर आता या वर्षातले अखेरचे चंद्रग्रहण 8 नोव्हेंबर रोजी दिसणार आहे.