पणजी: मुख्यमंत्री डॉ. प्रमोद सावंत यांनी शुक्रवारी सायंकाळी पणजीतील १८ जून रोडवर वाहतूक कोंडीचा ‘कटू’ अनुभव घेतला. मुख्यमंत्र्यांच्या वाहनांचा ताफा वाहतूक कोंडीत अडकलाच, शिवाय एक रुग्णवाहिकाही येथे अडकून पडली होती.

पणजीत (Panaji) सध्या स्मार्ट सिटी मिशनअंतर्गत कामे सुरू आहेत. त्यामुळे १८ जून रोडवर वाहतुकीचा ताण वाढला आहे. सायंकाळी पाचनंतर या रस्त्यावर वाहनांच्या रांगा लागलेल्या दिसतात. . वाहतूक पोलिसांच्या प्राथमिक नोंदीनुसार, पणजीत दररोज दहा हजारांवर वाहने ये-जा करतात. त्यात सरकारी, तसेच महत्त्वाची आस्थापने, दवाखाने, बँकांच्या प्रमुख शाखा असल्याने येथे येणारे लोक वाहने घेऊनच येतात. त्यात चारचाकी वाहने बरीच असतात.

पार्किंगमुळे अतिरिक्त ताण

१८ जून रोडवर एका बाजूला दुचाकी आणि दुसऱ्या बाजूला चारचाकी वाहनांचे पार्किंग आहे. जुन्ता हाऊसपासून पोलिस स्थानकाकडे जाणारा मार्ग गीता बेकरीजवळ बंद झाला आहे. त्यामुळे शहराबाहेर पडण्यासाठी १८ जून मार्गाचाच वापर करावा लागतो. शुक्रवारी सायंकाळी मुख्यमंत्र्यांच्या वाहनांचा ताफाही १८ जून रस्त्यावरून शहराबाहेर जाण्यासाठी निघाला खरा; पण त्यांनाही वाहतूक कोंडीचा सामना करावा लागला. स्मार्ट सिटीच्या (Smart City) कामांमुळे सध्या दररोज या मार्गावर वाहतूक कोंडी होते. या वाहतूक कोंडीचा कधी तरी मुख्यमंत्र्यांनाही अनुभव घ्यावा लागेल, असेही वाटले नसेल.