Chimbel Gramsabha गेल्या रविवारी (३० जुलै) झालेल्या ग्रामसभेत चिंबलमधील रस्त्यांवर पडलेले खड्डे तसेच कचरा समस्या २-३ दिवसांत सोडविली जाईल, असे आश्‍वासन सरपंचांनी दिले होते. मात्र, आठवडा उलटून गेला तरी तेथील खड्डे व कचरा समस्या ‘जैसे थे’ आहे. दिवसेंदिवस ही समस्या अधिक जटिल होत आहे.

या समस्येमुळे चिंबल परिसरात डेंग्यूचा प्रसार होण्याचा धोका निर्माण झाला आहे. सरपंचांनी दिलेल्या आश्‍वासनानुसार कामे न झाल्याने ग्रामस्थांनी संताप व्यक्त केला आहे.

मागील ग्रामसभेत चिंबल मंचचे अध्यक्ष गुरुदास शिरोडकर व इतर ग्रामस्थांनी चिंबल येथील रस्त्यांवर ठिकठिकाणी पडलेल्या खड्ड्यांची डागडुजी करण्याची मागणी केली होती. रस्त्याच्या बाजूला पेट्यांमध्ये कचरा भरून वाहत आहे. त्यामुळे तेथे दुर्गंधी पसरली आहे.

आमदार भाजपमध्ये, तरीही...

सांताक्रुझ मतदारसंघाचे आमदार तसेच जिल्हा पंचायत सदस्य हे सत्ताधारी पक्षातील असूनही ही कामे होत नसल्याने ग्रामस्थांनी नाराजी व्यक्त केली आहे.

सांताक्रुझच्या आमदारांनी या मतदारसंघातील विकासासाठी काँग्रेसमधून भाजपमध्ये प्रवेश केला असल्याचे स्पष्टीकरण दिले होते. मात्र, त्याचे परिणाम चिंबल परिसरात दिसत नाहीत.

दिवसेंदिवस चिंबल येथील परिसर गलिच्छ होण्याबरोबरच दुर्गंधीचे साम्राज्य वाढले आहे. त्यामुळे सरकारने या प्रकरणात लक्ष घालण्याची मागणी चिंबल मंचने केली आहे.