कर्नाटकातील जे मतदार गोव्यात कामगार म्हणून कार्यरत आहेत. त्यांना गोवा सरकारने कर्नाटकच्या विधानसभा निवडणूक मतदानादिवशी पगारी रजा जाहीर केली आहे. त्यावरून राज्यात विरोधी पक्षांनी तसेच उद्योगांनीही राज्य सरकारवर टीका केली आहे. त्यावर आता मुख्यमंत्री डॉ. प्रमोद सावंत यांनी प्रतिक्रिया व्यक्त केली आहे.

(CM Pramod Sawant On Paid leave to Karnataka Voters in Goa)

मुख्यमंत्री सावंत म्हणाले की, ही पगारी सुट्टी कर्नाटकातील जे मतदार गोव्यात काम करतात त्यांच्यासाठी आहे. उद्योगांनी हे समजून घेतले पाहिजे. गोव्यात जेव्हा मतदान होते तेव्हा महाराष्ट्र आणि कर्नाटक या दोन्ही राज्यांनीदेखील गोव्याच्या मतदारांना जे त्यांच्या राज्यात कार्यरत होते, त्यांना अशी पगारी रजा दिली होती.

मतदारांचा हा अधिकार आहे आणि तो राज्यघटनेने दिलेला आहे. हे उद्योगांना कळले पाहिजे. उद्योजकांनी याबाबत विचार केला पाहिजे.

ते म्हणाले, केंद्रीय निवडणूक आयोगाचे याबाबत दिशानिर्देश आहेत. कर्नाटकातील जे मतदार खासगी क्षेत्रात काम करत आहेत त्यांच्यासाठी ही सुट्टी आहे. माविन गुदिन्हो यांनी यापुर्वीच हे स्पष्ट केले आहे. कर्नाटक निवडणूक आयोगाच्या विनंतीनुसार हे केले गेले आहे.

आपण एकाच देशात राहतो. आपणही आपल्या निवडणुकीवेळीही शेजारील राज्यांच्या जिल्ह्यांमध्ये असे केले जाते.

दरम्यान, बेळगावमधील 18 पैकी 15 जागा भाजप जिंकेल तसेच कर्नाटकात भाजपचे सरकार पुन्हा निवडून येईल, असा विश्वासही मुख्यमंत्री डॉ. सावंत यांनी यावेळी व्यक्त केला.