Cab Service In Goa: गोव्यात अनेक दिवसांपासून कॅब सुविधेवरून वाद होत आहे. सरकार कॅब सुविधा सुरू करण्याबाबत सकारात्मक असले तरी, स्थानिक टॅक्सी चालकांचा त्याला विरोध होत आहे. गोवा माईल्स (Goa Miles) बाबत देखील सुधारणा करण्याची गरज अनेकवेळा मागणी झाली आहे. दरम्यान, गोव्यात ओला, उबर कधी सुरू होणार याबाबत खुद्द मुख्यमंत्री डॉ. प्रमोद सावंत यांनी माहिती दिली आहे. टाईम्स नाऊच्या समिट 2022 (Times Now Summit 2022) मध्ये गोव्याचे मुख्यमंत्री प्रमोद सावंत बोलत होते.

टाईम्स नाऊच्या समिटमध्ये मुख्यमंत्री सावंत यांना गोव्यात ओला, उबर कधी सुरू होणार (Ola, Uber In Goa) असा प्रश्न विचारण्यात आला. गोव्यात प्रवास करायचा झाल्यास टॅक्सी चालकांशी वाद घालावा लागतो किंवा गोवा माईल्स वापरावे लागते ते चालतच नाही. त्यामुळे गोव्यात टॅक्सी अॅप कधी सुरू होणार असा प्रश्न विचारण्यात आला आहे.

यावर उत्तर देताना मुख्यमंत्री म्हणाले, "गोव्यात टॅक्सीची समस्या होती, पण आम्ही गोवा माईल्स अ‍ॅपमध्ये सुधारणा केली आहे. गोव्यातील 25 टक्के टॅक्सीचालक गोवा माईल्सवरती आले आहेत. गोवा पर्यटन खात्याचे नवीन मोबाईल अ‍ॅप येत आहे. यावर 70 टक्क्याहून अधिकजण जोडले जातील. पुढच्या पर्यटन हंगामापासून गोव्यात पर्यटन विभागाचे टॅक्सी अ‍ॅप लोकांना उपलब्ध असेल."

तसेच, गोव्यात अजूनही अनेक ठिकाणी खराब नेटवर्क सुविधा आहे. यामुळे ऑनलाईन सुविधा वापरण्यास अनेकांना अडचण येते. यावर उत्तर देताना मुख्यमंत्री सावंत म्हणाले, गोव्यात आज देखील काही ठिकाणी नेटवर्क समस्या आहे. पण, नवीन पॉलिसी अंतर्गत आम्ही गोव्यातील नेटवर्क सुविधा सुधारण्यासाठी प्रयत्न करत आहोत. येत्या वर्षभरात राज्यात उत्तम नेटवर्क सुविधा असेल असे मुख्यमंत्री म्हणाले.