Goa News: गोव्याची इंटरनॅशनल मास्टर (आयएम) बुद्धिबळपटू, ऐतिहासिक बुद्धिबळ ऑलिंपियाड ब्राँझपदक विजेती भक्ती कुलकर्णी हिची प्रतिष्ठेच्या अर्जुन पुरस्कारासाठी शिफारस करण्यात आली आहे.

निवृत्त न्यायमूर्ती ए. एम. खानविलकर यांच्या अध्यक्षतेखालील पुरस्कार समितीने 2022 सालच्या क्रीडा पुरस्कारांसाठी खेळाडूंच्या नावांची शिफारस केली आहे, त्यात महिला बुद्धिबळपटू भक्ती कुलकर्णी, पुरुष बुद्धिबळपटू आर. प्रज्ञानंद यांचा समावेश आहे.

एकूण 25 क्रीडापटूंची अर्जुन पुरस्कारासाठी, तर सर्वोच्च ध्यानचंद खेलरत्न पुरस्कारासाठी टेबल टेनिसपटू अचंता शरथ कमल याची शिफारस करण्यात आली आहे. केंद्राने सरकारने शिफारसीस मान्यता दिल्यानंतर पुरस्कार वितरण होईल.

...तर तिसरी गोमंतकीय

मडगाव येथील 30 वर्षीय भक्ती ‘अर्जुन’ने सन्मानित झाल्यानंतर राष्ट्रीय क्रीडा क्षेत्रातील हा सन्मान प्राप्त करणारी अवघी तिसरीच गोमंतकीय ठरेल. यापूर्वी गोलरक्षक ब्रह्मानंद शंखवाळकर (1997) व आघाडीपटू ब्रुनो कुतिन्हो (2001) या गोमंतकीय फुटबॉलपटूंनाच हा प्रतिष्ठित मिळालेला आहे.