Goa Chess Association Election : गोवा बुद्धिबळ संघटनेच्या कार्यकारी समितीच्या निवडणुकीत अध्यक्षपदाच्या शर्यतील राज्यसभा खासदार विनय तेंडुलकर यांचा पराभव झाला आहे. तिसवाडीचे महेश कांदोळकर 14 मते मिळवत विजयी झाले असून, तेंडुलकर यांना केवळ सहा मतांवर समाधान मानावे लागले. खासदार तेंडुलकर यांच्यासाठी हा मोठा झटका मानला जात आहे.

विनय तेंडुलकर आणि त्यांच्या सहकाऱ्यांसाठी कार्यकारी समिती निवडणूक प्रतिष्ठेची मानली जात होती. निवडणुकीत प्रत्येक तालुक्याचे दोन प्रतिनिधी मतदानाचा हक्क बजावला.

अशी आहे मतदानाची आकडेवारी

अध्यक्षपदाच्या निवडणुकीत विनय तेंडुलकर (धारबांदोडा तालुका) यांच्यासमोर तिसवाडीचे महेश कांदोळकर यांचे आव्हान होते. कांदोळकर यांना 14 तर तेंडुलकर यांना केवळ सहा मते मिळाली आहेत.

सचिवपदासाठी झालेल्या मतदानात सासष्टीच्या आशेष केणी यांना 14 व काणकोणचे शरेंद्र नाईक यांना 6 मते मिळाली, खजिनदार पदासाठी बार्देशच्या विश्वास पिळर्णकर यांना 14 व मुरगावच्या किशोर बांदेकर यांना 6 मते मिळाली आहेत.

तसेच, दक्षिण गोवा दोन संयुक्त सचिव पदासाठी समीर नाईक (केपे), किशोर गावस देसाई (सांगे) व अमोघ नमशीकर (फोंडा) असे तीन उमेदवार रिंगणात होते. त्यात अमोघ नमशीकर यांना 14 मते मिळाली असून, ते विजयी झाले आहेत.

बुद्धिबळ संघटनेच्या कार्यकारी समितीत एकूण 12 सदस्य आहेत, त्यापैकी सात पदाधिकारी ऑगस्ट 2021 मधील निवडणूक प्रक्रियेत बिनविरोध ठरले होते. 

त्यानंतर अध्यक्ष, सचिव, खजिनदार आणि दक्षिण गोवा संयुक्त सचिवपदाच्या दोन जागांसाठी मतदान आज (रविवारी, ता. 09) पणजीत सकाळी साडेदहा ते दुपारी बारा या कालावधीत पार पडले. मतदान झाल्यानंतर लगेच निकाल जाहीर करण्यात आला.