Bull Fight In Goa: मागील काही वर्षांपासून राज्यात अनेक ठिकाणी बैलांच्या बेकायदा झुंजी (धिरयो) लावल्या जातात. खरं तर या ‘धिरयो’ला बंदी असल्याने आणि पोलिस कारवाईच्या भीतीने सहसा धिरयो आयोजित केले जात नाहीत. पण अजूनही काही ठिकाणी छुप्या पद्धतीने धिरयोचे आयोजन केले जाते.

याच कृतीवर नियंत्रण मिळवण्यासाठी आणि बेकायदेशीर झुंजी रोखण्यासाठी उच्च न्यायालयाने दिलेल्या आदेशानंतर आता गोवा पोलिसांनी हेल्पलाइन क्रमांकासह व्हॉट्सअ‍ॅप क्रमांक आणि वेबसाईट जारी केली आहे.

पोलिस विभागाने प्रेस नोटमध्ये जनतेला 112 या हेल्पलाइन नंबरवर कॉल करण्याचे किंवा व्हॉट्सअॅप क्रमांक 7875756000 वर मॅसेज करण्याचे आवाहन केले आहे. तसेच गोवा पोलिसांच्या www.goapolice.gov.in या वेबसाइटवर देखील लोकांनी लॉग इन करून बेकायदेशीर झुंजी रोखण्यासाठी पोलीस खात्याला मदत करण्याचे आवाहन केले आहे. .

राज्यात ‘धिरयो’ला बंदी असून अनेक भागात त्या आयोजित केल्या जातात. अनेकदा या धिरयोमध्ये ज्या बैलांचा किंवा रेड्यांच्या झुंजी लावण्यात येतात त्याची जाहिरात  डिजीटल  प्लॅटफॉर्मवरून केली जाते. मात्र याच कृतीवर नियंत्रण मिळवण्यासाठी पोलीस खाते अलर्ट मोडवर असून पोलिसांशी संपर्क साधण्यासाठी आवश्यक ते मार्ग उपलब्ध करून देण्यात आले आहेत.