पणजी: इयत्ता ९वीच्या दुसऱ्या सत्र परीक्षेला २१ मार्चपासून सुरुवात होणार असल्याची घोषणा गोवा माध्यमिक व उच्च माध्यमिक शिक्षण मंडळाने केली आहे. परीक्षेच्या पारदर्शकतेसाठी सर्व शाळांना सीसीटीव्ही कॅमेरे बसवणे अनिवार्य केले आहे. सीसीटीव्ही नसलेल्या शाळांना परीक्षा सुरू होण्यापूर्वीच ही यंत्रणा कार्यान्वित करण्याचे निर्देश मंडळाने दिले आहेत.
या शैक्षणिक वर्षात प्रथमच राष्ट्रीय शैक्षणिक धोरण २०२० लागू केल्यानंतर इयत्ता ९वीचा अभ्यासक्रम दोन सत्रांमध्ये विभागला गेला आहे. गोवा बोर्ड या दोन्ही सत्रांसाठी प्रश्नपत्रिका तयार करत आहे. पहिल्या सत्राच्या परीक्षा ऑक्टोबरमध्ये घेण्यात आल्या होत्या. दुसऱ्या सत्रासाठी सिद्ध केलेल्या सिद्धांत प्रश्नपत्रिका ४० गुणांच्या असतील, तर प्रात्यक्षिक आणि असाईनमेंटसाठी ६० गुण राखीव ठेवण्यात आले आहेत. उत्तर पत्रिकांचे मूल्यमापन संबंधित शाळाच करतील.
इतर राज्ये किंवा आंतरराष्ट्रीय स्तरावरील क्रीडा स्पर्धांमध्ये सहभागी होणाऱ्या विद्यार्थ्यांना सत्र परीक्षा देता आल्या नाहीत, तर त्यांच्यासाठी परत आल्यानंतर पूरक परीक्षा घेतली जाईल, असे मंडळाने स्पष्ट केले आहे.
परीक्षेदरम्यान कोणतेही गैरप्रकार होऊ नये म्हणून प्रत्येक शाळेने आपापल्या परीक्षेच्या ठिकाणी आवश्यक ती खबरदारी घ्यावी, असे मंडळाने म्हटले आहे. विद्यार्थ्यांनी परीक्षा केंद्रावर सकाळी ८.३० वाजता उपस्थित राहावे. कोणत्याही विषयाच्या परीक्षेला अर्धा तास उशिरा पोहोचणाऱ्या विद्यार्थ्यांना परीक्षेला बसण्याची परवानगी दिली जाणार नाही.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.