पणजी: आगामी २०२७ च्या विधानसभा निवडणुकीत सलग चौथ्यांदा स्पष्ट बहुमत मिळविण्याचे उद्दिष्ट भाजपने ठेवले आहे. मुख्यमंत्री डॉ. प्रमोद सावंत यांच्या नेतृत्वाखालील सरकारने केलेली पायाभूत गुंतवणूक, विविध विकासकामे आणि लोककल्याणकारी योजनांच्या बळावर पुन्हा सत्ता मिळविण्याचा निर्धार भाजपच्या प्रदेश कार्यकारिणीच्या बैठकीत व्यक्त करण्यात आला.

यावेळी सावंत सरकारच्या अभिनंदनाचा ठराव एकमताने मंजूर करण्यात आला. भाजपच्या प्रदेश कार्यकारिणीच्या बैठकीत राज्यातील विकासकामांचा आढावा घेत आगामी विधानसभा निवडणुकीच्या रणनीतीवरही चर्चा झाली. राज्यात सुमारे ३२ हजार कोटी रुपयांची पायाभूत गुंतवणूक करण्यात आल्याचा ठळक उल्लेख ठरावात करण्यात आला.

आरोग्य, कृषी, पायाभूत सुविधा आणि विविध लोककल्याणकारी योजनांच्या माध्यमातून सरकारने केलेल्या कामांची माहिती जनतेपर्यंत पोहोचविण्यावर भर देण्यात आला. भाजपचे प्रदेश उपाध्यक्ष अ‍ॅड. नरेंद्र सावईकर यांनी बैठकीतील ठरावाची माहिती दिली. यावेळी आरोग्यमंत्री विश्वजित राणे आणि आदिवासी कल्याणमंत्री रमेश तवडकर उपस्थित होते. सावंत सरकारच्या अभिनंदनाचा ठराव राणे आणि तवडकर यांनी अनुमोदित केला.

प्रचारासाठी प्रभावीपणे रणनीती

सरकारच्या विकासकामांचा आणि योजनांचा आगामी निवडणुकीत प्रचारासाठी प्रभावीपणे वापर करण्याची रणनीती भाजप आखत आहे. सलग चौथ्यांदा बहुमत मिळविण्याचे उद्दिष्ट समोर ठेवताना विकासकामांची माहिती मतदारांपर्यंत पोहोचविणे, संघटनात्मक पातळीवर पक्ष अधिक मजबूत करणे आणि स्थानिक प्रश्नांना सामोरे जाणे, यावरही पक्षाला लक्ष केंद्रित करावे लागणार आहे.