Goa Viral Post On South Goa Candidate

भाजपने दक्षिण गोव्यातून उद्योजिका पल्लवी धेंपे यांना लोकसभेसाठी उमेदवारी जाहीर केली आहे. भाजपमधून किंवा महिला मोर्चातून योग्य उमेदवार मिळाला नाही, त्यामुळे भाजपने उद्योजक महिलेला उमेदवारी दिल्याचा आरोप विरोधकांकडून केला जात आहे.

माजी खासदार नरेंद्र सावईकर आणि महिला मोर्चाला 'बाबाजी का ठुल्लू' मिळाला असा आरोप आपचे गोवा संयोजक अमित पालेकर यांनी केला.

नरेंद्र सावईकर आणि महिला मोर्चाला 'बाबाजी का ठुल्लू' मिळाला. भाजप व महिला मोर्चामध्ये योग्य उमेदवार नसल्याने उमेदवार त्यांना आयात करावा लागला. ते काय फक्त ढोल वाजविण्यासाठी आहेत का? ढोंगीपणाचा कळस, असे ट्विट आपच्या अमित पालेकर यांनी केले आहे.

याला भाजपचे प्रवक्त गिरीराज पै वेर्णेकर यांनी उत्तर दिले आहे. उमेदवारी जाहीर करुन माघार घ्यावी लागणाऱ्या वेंझी व्हिएगस यांना 'बाबाजी का ठुल्लू' मिळाला आहे. दिल्ली आणि पंजाब येथील जागांच्या बदल्यात गोवा आपच्या कार्यकर्त्यांना त्याग करावा लागला. गोव्यात आप वाढविण्यासाठी काम करणाऱ्या कार्यकर्त्यांकडे दुर्लेक्ष करुन २०२२ मध्ये अमित पालेकर यांना मुख्यमंत्री पदाचे उमेदवार करण्यात आले. विसरले? असा पलटवार वेर्णेकर यांनी केला.

एका उद्योजक महिलेला उमेदवारी देऊन भाजपने एकनिष्ठ कार्यकर्त्यांच्या त्याग, समर्पणाकडे दुर्लेक्ष केले आहे. गोव्यातील भाजप नेते दिल्लीतील हिकूमशाही पुढे हतबल असल्याचे दिसून आले आहे, अशा शब्दात विरोधी पक्षनेते युरी आलेमाव यांनी टीका केली.

प्रिय युरी तुमचे उमेदवार अद्याप का जाहीर झाले नाहीत, याचे स्पष्टीकरण देऊ शकता का? तुमच्याकडे समर्पित कार्यकर्त्यांचा तुटवडा आहे का? भाजपमधील सर्वजण पल्लवी धेंपे यांच्या उमेदवारीला संपूर्ण समर्थन देतात. तुमचा उमेदवार कुठेय? चार जूनला आणखी एक धक्का सहन करण्यासाठी तयार राहा, असे उत्तर गिरीराज यांनी आलेमाव यांना दिले आहे.