Goa Trinamool Congress: भाजपकडून केंद्रात आणि गोव्यात सूडाचे राजकारण केले जात असून सरकारला प्रश्‍न करणाऱ्यांना अटक करून त्यांचा आवाज दाबण्याचा प्रयत्न होत आहे. तृणमूल काँग्रेसचे राष्ट्रीय प्रवक्ते साकेत गोखले यांना देखील अशाच प्रकारे गुजरात पोलिसांनी दोनवेळा अटक केली होती. हा विरोधी आवाजावरच नाही, तर लोकशाहीवर हल्ला आहे, अशी टीका गोवा तृणमूल काँग्रेसचे संयुक्त संयोजक समिल वळवईकर यांनी केली.

पणजी येथे घेतलेल्‍या पत्रकार परिषदेत ते बोलत होते. यावेळी त्यांच्यासोबत पक्षाचे माध्यम समन्वयक ट्रोजन डिमेलो आणि पक्षाचे आयटी समन्वयक तनोज अडवलपालकर उपस्थित होते. जगातील सर्वात मोठी लोकशाही आपल्या देशात आहे, परंतु गेल्या आठ वर्षांत आपल्या लोकशाहीला भाजपकडून निरंतर हानी पोहोचवली जात आहे.

लोकशाही नष्ट करण्यासाठी त्यांच्याकडून होत असलेल्या प्रयत्नांची असंख्य उदाहरणे आहेत. जेव्हा जेव्हा विरोधक खासकरून तृणमूल काँग्रेस सत्ताधारी कारभाराविरोधात आवाज उठवते, तेव्हा भाजप सरकार आमच्या नेत्यांचा आवाज दाबून त्यांना त्रास देते, असा आरोप वळवईकर यांनी केला.