Goa BJP: देशातील पाच राज्यांसाठी यावर्षी विधानसभा निवडणुका जाहीर झाल्या आहेत. गोव्यातही निवडणुकांचे वारे वाहू लागले आहे. याच पार्श्वभूमीवर सध्याचा गोव्यातील सत्ताधारी पक्ष भाजप (BJP) देखील पुन्हा सत्तेत येण्यासाठी अटीतटीचे प्रयत्न करत आहे.

भाजप पक्षातर्फे आपले उमेदवार जाहीर होत आहेत. स्वत: मुख्यमंत्री आणि इतर आमदारांनी घरोघरी जाऊन आपल्या निवडणूक प्रचाराला सुरुवात केली आहे. यादरम्यान पक्षातर्फे आजवर जी काही विकासकामे केली ती पुन्हा एकदा नव्याने जनतेसमोर आणली जात आहे. मधल्या काळात अनेक भाजपच्या नेत्यांनी पक्षाला रामराम ठोकला. पण त्याचा पक्षाला काडीमात्रही फरक पडला नाही. उलट अनेकांनी नव्याने पक्षात प्रवेश केला आहे.

सध्या गोव्याचे मुख्यमंत्री डॉ. प्रमोद सावंत (Pramod Sawant) यांनी वेळोवेळी भाजप पक्षाबद्दल अतूट विश्वास व्यक्त केला आहे. त्यांच्यामते 'गोव्यातल्या जनतेने आजवरचे भाजप पक्षाचे कामकाज पाहिले आहे. जनतेचा पक्षावर पूर्ण विश्वास आहे. त्यामुळे या निवडणुकीत गोवेकर भाजप आमदारांना निवडून देऊन राज्यात पुन्हा भाजपचेच सरकार स्थापन करेल, असा आम्हाला विश्वास आहे.'

या विधानसभा निवडणुकीत (Goa Assembly Elections 2022) नेमके कुणाचे सरकार स्थापन होणार, हे या निवडणुकीत उत्कंठावर्धक असणार आहे.