Goa News: आठवडी बाजार म्हटला, की टाकाऊ भाजीपाला आदी कचऱ्याची मोठी समस्या असते. डिचोलीतही पूर्वी ही समस्या होती. पण पालिकेचे सकारात्मक धोरण आणि सफाई कामगारांचे तेवढेच सहकार्य यामुळे आता या समस्येवर बरेच नियंत्रण आले आहे. आठवडी बाजार संपला की त्या रात्रीच कचऱ्याची उचल करून त्याची विल्हेवाट लावण्यात येते.

यापूर्वी आठवडी बाजाराच्या दुसऱ्या दिवशी सकाळी बाजारात गेले, की सर्वत्र कचऱ्याचे विदारक चित्र दिसायचे. बाजारातील या कचऱ्याची उचल होईपर्यंत दुपार उलटायची. तोपर्यंत बाजारात मोठी समस्या निर्माण व्हायची. मात्र, आता आठवडी बाजारानंतर ही समस्या दिसून येत नाही.

मध्यरात्रीपर्यंत साफसफाई

• बुधवार हा डिचोलीच्या आठवडी बाजाराचा दिवस. बाजारातील विक्रेते रात्री साधारण नऊ वाजण्याच्या सुमारास आपला गाशा गुंडाळतात. त्यानंतर पालिकेच्या सफाई कामगारांची ड्युटी सुरू होते.

• बाजाराच्या दिवशी भाजी मार्केट आदी बाजारातील सर्वच परिसर टाकाऊ कचऱ्याने व्यापून गेलेला असतो. मात्र, सफाई कामगार रात्रीच कचऱ्याची उचल करण्याच्या कामाला लागतात. यात महिला कामगारांचाही समावेश असतो.

• मध्यरात्रीपर्यंत साफसफाईचे काम चालू असते. रात्रीच हा कचरा लाखेरे येथील पालिकेच्या कचरा प्रक्रिया प्रकल्पात नेण्यात येतो. दुसऱ्या दिवशी सकाळी बाजारात आल्यास आदल्या दिवशी आठवडी बाजार भरला होता की नाही, त्याबाबत शंका येते.

"आठवडी बाजाराच्या दिवशी रात्रीच कचऱ्याची उचल करण्यात येत असल्याने दुसऱ्या दिवशी बाजारात कचऱ्याची समस्या निर्माण होत नाही. ग्राहकांनाही मनमोकळेपणाने फिरता येते. स्वच्छता मोहिमेत सफाई कामगारांचे योगदान महत्त्वाचे आहे. डिचोली शहर स्वच्छ ठेवण्यासाठी पालिका तत्पर आहे."

- कुंदन फळारी, नगराध्यक्ष, डिचोली