Goa Market: डिचोली-साखळी रस्त्यावर वाठादेव भागात सध्या मासेविक्रेत्यांनी आक्रमण केलेले आहे. या रस्त्यावरच मासळीचा बाजार भरत आहे. रस्त्यावरील मासेविक्रीमुळे वाहतुकीस धोका निर्माण झाला असून, भीषण अपघाताची शक्‍यता नाकारता येत नाही.

झांट्ये महाविद्यालय ते आरोग्यकेंद्रापर्यंतच्या रस्त्याच्या बाजूने गेल्या काही दिवसांपासून मासेविक्रीचा व्यवसाय चालत आहे. सायंकाळच्या वेळी रस्त्याच्या बाजूने विक्रेते मासळीची विक्री करताना आढळून येत आहेत. ज्या भागात मासळीचा बाजार भरतोय, तो भाग कारापूर-सर्वण पंचायत क्षेत्रात येतो. या प्रकाराकडे स्थानिक पंचायतीचेही दुर्लक्ष होत आहे.

गेल्या वर्षी डिचोली शहरातील पुलाजवळील जंक्शनवर सायंकाळच्या वेळी मासळीचा बाजार भरत असे. मात्र नगरपालिकेच्या कारवाईनंतर मासेविकेत्यांना तेथून गाशा गुंडाळावा लागला होता. आता वाठादेव भागात हा बाजार भरत आहे.

वाहने रस्‍त्‍यावरच थांबवून मासे खरेदी

वाठादेव भागात रस्त्याच्या बाजूने काही परप्रांतीय महिला आणि पुरुष मासेविक्रीचा धंदा करीत आहेत. रस्त्यावर बसणाऱ्या या मासेविक्रेत्यांकडून मासळी खरेदीही जोरात चालते. रस्त्यावरुन ये-जा करणारे बरेचजण आपापली वाहने थांबवून मासे खरेदी करताना दिसून येतात.

बऱ्याचदा मासळी खरेदी करण्यासाठी गर्दी झालेली दिसून येते. रस्त्यावरील या गर्दीमुळे वाहतुकीसही अडथळा निर्माण होत आहे. त्‍यामुळे संबंधित यंत्रणेने त्‍वरित पावले उचलून या मासळी विक्रेत्‍यांना तेथून उठवावे, अशी मागणी जोर धरू लागली आहे.