Pramod Sawant: 31 डिसेंबरपर्यंत राज्यातील सर्व खाण ब्लॉकचा लिलाव अपेक्षित आहे. दोन टप्प्यांत ही प्रक्रिया होणार आहे. कोडली खाण ब्लॉकच्या लिलावास प्राधान्य देण्याची ग्वाही देऊन ‘धीर धरा, सर्व काही व्यवस्थित होईल’, असा दिलासा मुख्यमंत्री डॉ. प्रमोद सावंत यांनी कोडली येथील सेझा (वेदांता) कंपनीच्या कामगारांना दिला.

कामगारांच्या भवितव्याचा विचार करून कोडली खाण ब्लॉकचा लिलाव करा, अशी मागणी करण्यासाठी सेझाच्या कामगारांनी रविवारी साखळी येथील रवींद्र भवनजवळ मुख्यमंत्री डॉ. सावंत यांची भेट घेतली. लक्षदीप आर्सेकर यांच्या नेतृत्वाखाली शंभरहून अधिक कामगार साखळीत आले होते. मुख्यमंत्री सावंत यांनी कामगारांचे म्हणणे ऐकून घेत त्यांना सकारात्मक प्रतिसाद दिला. राज्यातील खाण ब्लॉकच्या लिलावाची प्रक्रिया सर्व सोपस्कारांसह पूर्ण करण्यात येणार असल्याचेही मुख्यमंत्र्यांनी स्पष्ट केले.

न्यायालयाकडून मिळाला दिलासा

सेझाच्या कोडली खाणीवरील कामगारांना सेवेतून कमी करण्याच्या निर्णयाला मुंबई उच्च न्यायालयाच्या गोवा खंडपीठाने अंतरिम स्थगिती दिली आहे. त्यामुळे कामगारांना तूर्तास दिलासा मिळाला आहे. वेदांता कंपनीने कर्मचाऱ्यांना सेवेतून कमी करण्याचा निर्णय घेतला होता. त्यानुसार 1 सप्टेंबर रोजी 443 कर्मचाऱ्यांना सेवेतून कमी करण्याची नोटीस जारी केली होती. या आदेशाविरोधात कामगारांनी मजूर व रोजगार मंत्रालयाकडे अर्ज केला होता.