Goa Utsav: मयेतील श्री केळबाय देवस्थानशी संबंधित उत्सव किंवा मंदिर बंद करण्याचा निर्णय घेण्यापूर्वी प्रशासकीय अधिकाऱ्यांनी वस्तुस्थिती जाणून घेतानाच आम्हा लोकांना विश्वासात घ्यावे, अशी मागणी केळबायवाडा येथील ग्रामस्थांच्या बैठकीत करण्यात आली.

देवस्थानशी संबंधित उत्सवात प्रत्येकवेळी गावाशी संबंध नसलेले देवस्थान समितीतील दोन पदाधिकारी 'खो' घालण्याचे कृत्य करतात, असा आरोपही या बैठकीत करून संबंधितांचा निषेधही करण्यात आला.

अलीकडेच झालेल्या नवरात्रोत्सवावेळी देवस्थान समितीने हरकत घेतल्याने काहीसा तणाव निर्माण झाला होता. नवरात्रोत्सवातील कार्यक्रमांवर बंदी घालण्याचा आदेशही प्रशासनाने घेतला होता. त्याचबरोबर गणपती विसर्जन तळी आणि मंडप बांधकाम करण्यासही हरकत घेतली होती.

त्या पार्श्वभूमीवर चर्चा करण्यासाठी काल रविवारी केळबायवाडा येथील श्री केळबाय मंदिरात बैठक घेण्यात आली. या बैठकीस नाईक गावकर, गणेशोत्सव आणि मंडप बांधकाम समितीचे पदाधिकारी हरी नाईक गावकर, राघोबा नाईक गावकर, बबन नाईक, मनोहर नाईक, नितीन गाड्डी आदी प्रतिनिधी उपस्थित होते.

अधिकाऱ्यांनीही वस्तुस्थिती जाणून घ्यावी

या बैठकीत उपस्थितांनी नवरात्रोत्सव काळात प्रशासनाने जे निर्णय घेतले, ते दबावाखाली घेतल्याचा दावा केला. गावाचा इतिहास माहीत नसलेले देवस्थान समितीतील दोन पदाधिकारी उत्सव बंद पाडण्यासाठी विघ्ने निर्माण करतात.

प्रशासकीय अधिकारीही वस्तुस्थिती आणि इतिहास जाणून न घेताच निर्णय घेतात, असा आरोप हरी नाईक गावकर, राघोबा नाईक, बबन नाईक यांनी केला.