Goa Controversy: डिचोली बाजारात 'लमाणी' भाजी विक्रेत्यांच्या दोन गटांत झालेल्या वादाचे रूपांतर हातघाईवर येऊन दोन्ही गटांतील महिला मिळून एकमेकांना मारहाण करण्यात आली. हाताला मिळेल ती वस्तू घेऊन एकमेकांना मारहाण करण्यात आली.

काहीवेळ बाजारात तणावही निर्माण झाला. हा प्रकार काल आठवडी बाजाराच्या दिवशी सायंकाळी 7.30 वाजण्याच्या सुमारास घडला. अचानक घडलेल्या या प्रकारामुळे बाजारहाटीसाठी आलेल्या ग्राहकांनाही बराच मनस्ताप सहन करावा लागला.

नगराध्यक्ष कुंदन फळारी बाजारात दाखल झाले. पोलिसांनाही पाचारण करण्यात आले. तोपर्यंत वाद निवळला होता. आणि पोलिस येताच मारामारी करणारे बाजारातून गायब झाले. दादागिरी खपवून घेतली जाणार नाही. अशी तंबी नगराध्यक्ष श्री. फळारी यांनी बाजारातील विक्रेत्यांना दिली आहे.

पालिकेत आज चर्चा

बाजारात बसणाऱ्या लमाणी विक्रेत्यांना चर्चेसाठी आज सकाळी पालिकेत बोलाविण्यात आले आहे. तेथे त्यांना भांडणाबाबत निश्चितपणे जाब विचारण्यात येण्याची शक्यता आहे.

बाजारात भांडणाऱ्यांना प्रतिबंध करा

डिचोलीच्या आठवडी बाजारात अधूनमधून भाजी विक्रेत्यांमध्ये वाद सुरुच असतात. काही महिन्यांपूर्वी दोन गटात मारामारी झाली होती. त्यानंतर पालिकेने संबंधीत विक्रेत्यांना काही आठवडे बाजारात बसण्यास मनाई केली होती. पुन्हा वाद होऊ लागल्याने संबंधीत विक्रेत्यांना बाजारात बसण्यास प्रतिबंध करावा, अशी मागणी ग्राहकांकडून होत आहे.