Pramod Sawant: गोव्यात वास्तव्य करणाऱ्या कन्नडीगांसह राज्याबाहेरील प्रत्येकाने राज्याचे कायदे पाळायलाच हवेत, असे मुख्यमंत्री डॉ. प्रमोद सावंत यांनी स्पष्ट केले. कर्मभूमी कन्नड संघ, डिचोलीतर्फे आयोजित कन्नड सांस्कृतिक संमेलनाचे उद्घाटन केल्यानंतर ते प्रमुख पाहुणे या नात्याने बोलत होते.

गोव्यात कन्नड भवन व्हावे, अशी कन्नड बांधवांची जी मागणी आहे. त्याला सरकारची कोणतीही हरकत नाही. मात्र हे भवन कन्नड बांधवांनी स्वखर्चाने बांधावे, असेही मुख्यमंत्री डॉ. सावंत यांनी स्पष्ट केले.

बंगळूरू येथील कन्नड आणि सांस्कृतिक विभाग आणि कर्नाटक जागृती वेदिके यांच्या संयुक्त विद्यमाने येथील हिराबाई झांट्ये स्मृती सभागृहात हुक्केरी मठाचे चंद्रशेखर शिवाचार्य स्वामीजींच्या उपस्थितीत आयोजित या संमेलनाच्या अध्यक्षस्थानी बांगळूरू येथील सार्वजनिक वाचनालय विभागाचे संचालक डॉ. सतीशकुमार होसमणी उपस्थित होते.

यावेळी मंत्री निळकंठ हळर्णकर, डिचोलीचे आमदार डॉ. चंद्रकांत शेट्ये, मयेचे आमदार प्रेमेंद्र शेट, कलंगुटचे आमदार मायकल लोबो, माजी सभापती राजेश पाटणेकर, डिचोलीचे नगराध्यक्ष कुंदन फळारी, हनुमंतप्पा शिरूर आदी कन्नड संघाचे पदाधिकारी उपस्थित होते.

चंद्रशेखर शिवाचार्य स्वामी यांनी बोलताना डॉ. प्रमोद सावंत यांच्या नेतृत्वाखालील सरकारला आशीर्वाद दिले दिवसभर चाललेल्या या संमेलनात कन्नड संस्कृतीचे दर्शन घडविणारे विविध सांस्कृतिक कार्यक्रम सादर करण्यात आले.

शहरात भव्य रॅली

संमेलनाच्या उद्‌घाटनापूर्वी ढोलताशांच्या निनादात कन्नड भगिनींतर्फे डोक्यावर कुंभ घेऊन शहरात भव्य रॅली काढली. गावकरवाडा येथील श्री शांतादुर्गा मंदिराकडून रॅलीला प्रारंभ झाला. संमेलनस्थळी येताच रॅलीची सांगता झाली. या रॅलीत शेकडो कन्नड भगिनी सहभागी झाल्या होत्या. या रॅलीतून शहरात कन्नडिगांचे शक्तिप्रदर्शन दिसून आले.