Dasara Puja 2022: विजयादशमी अर्थातच दसऱ्याच्या पार्श्वभूमीवर डिचोलीत लाल-पिवळ्या झेंडू फुलांनी बाजार फुलला आहे. यंदा मात्र झेंडू फुलांची आवक काहीशी घटल्याचे जाणवत आहे. स्थानिक झेंडू फुलांचा तुटवडा निर्माण झाला आहे. दरवर्षीप्रमाणे यंदाही शेजारील राज्यांतून झेंडू फुले विक्रीस उपलब्ध झाली आहेत.

दसरोत्सव काळात डिचोलीत जवळपास दहा टन झेंडू फुलांची विक्री होते. झेंडू फुलांची आवक कमी असल्याने या फुलांचा भावही वाढला आहे. दरम्यान, डिचोलीत यंदाही राज्याबाहेरील विक्रेत्यांचा आकडा अधिक असल्याचे आढळून येत असून, हे विक्रेते बाजारासह मोक्याच्या ठिकाणी झेंडू फुलांची विक्री करताना दिसून येत आहेत.

मर्यादित पुरवठ्यामुळे भाव वधारला

दसऱ्यानिमित्त झेंडूच्या फुलांना मागणी असल्याने या फुलांचा भाव वाढला आहे. मंगळवारी सायंकाळपर्यंत 120 ते 150 रुपये प्रतिकिलो या दराने फुलांची विक्री होत होती. काही विक्रेते फुलांच्या तयार माळांची विक्री करताना दिसून येत होते.

40 ते 60 रुपये मीटर असे या माळांचे दर आहेत. दसऱ्याच्या पूर्वदिनी संध्याकाळपर्यंत बाजारात उपलब्ध झालेल्या झेंडूच्या फुलांपैकी जवळपास 60 टक्के फुलांची विक्री झाल्याची माहिती विक्रेत्यांकडून मिळाली.

गावठी झेंडू कुठे?

गेल्या काही वर्षांपासून कर्नाटक, महाराष्ट्रासह अन्य शेजारील राज्यांतून डिचोलीत झेंडू फुलांची आवक होत असते. पावसामुळे यंदा कर्नाटक राज्यात झेंडू फुलांच्या बहरावर परिणाम झाला आहे. त्यामुळे यंदा विक्रेत्यांनी महाराष्ट्रातून झेंडू फुलांची आयात केली आहे. स्थानिक मळेही बहरले नसल्याने क्वचित अपवाद सोडल्यास गावठी झेंडूची फुलेही बाजारात दिसून येत नाहीत.