म्हापसा: उत्तर गोव्यातील समुद्र किनाऱ्यावर घडलेल्या मारहाणीच्या प्रसंगानंतर पोलीस अधिकाऱ्यांनी आता कळंगुट, कांदोळी आणि मांद्रे किनारपट्टीतील शॅक्स १२ वाजेपर्यंत बंद ठेवण्याचे आदेश दिले आहेत. पोलीस या आदेशाची अंमलबजावणी करत असून याचा फटका एकूण २३६ शॅक्सना बसला आहे.

आमच्याजवळ रात्री १ वाजेपर्यांत शॅक्स सुरु ठेवण्याचे आदेश असताना देखील पोलीस अशी सक्ती का करतायत असा प्रश्न शॅक मालक उपस्थित करत आहेत, तर यावर उत्तर देताना आम्ही नियमांचे पालन करत असल्याचं पोलीस म्हणालेत.

काही दिवसांपूर्वी कळंगुट परिसरात झालेला पर्यटकाचा मृत्यू, कांदोळी आणि मांद्रे येथे पर्यटकांना मारहाण अशा घटनानंतर उत्तर गोव्याचे पोलीस अधीक्षक अक्षत कौशल यांनी या भागांमधील शॅक्स रात्री ११ वाजता बंद करण्याचे आदेश दिले होते मात्र त्यांनतर आमदारांच्या विनंतीवरून ही मुदत १२ पर्यंत वाढवण्यात आली होती.

किनाऱ्यांवर वाढणाऱ्या गुन्ह्यांवर आळा बसवण्यासाठी आता रात्रीच्यावेळी शॅक्स बंद झाल्यानंतर कुणालाही किनाऱ्यावर फेरफटका मारता येणार नाही किंवा मद्य प्राशन करता येणार नाही. रात्री १० वाजेपर्यंत किनाऱ्यावरील शॅक्समधलं संगीत बंद होतं मात्र परवान्यासह शॅक्स मात्र रात्री ११ वाजेपर्यंत खुलेच असतात. मालकांच्या मते मध्यरात्री १ पर्यंत दारू विकण्याचा परवाना त्यांना अबकारी खात्याने दिलेला आहे आणि असे असताना देखील रात्री १२ पर्यंत शॅक बंद करण्याची सक्ती ही पटणारी नाही.

राज्यातील सर्व समुद्रकिनाऱ्यांवर शॅक्सबाबतचे नियम सामान आहेत, मात्र उत्तर गोव्यातील कळंगुट, कांदोळी आणि मांद्रे येथे वाढणाऱ्या गंभीर प्रकरणांमुळे त्यांच्यावर पोलिसांकडून करडी नाराज ठेवली जाईल. गोवा शॅक मालक कल्याण सोसायटीचे सरचिटणीस जॉन लोबो यांच्या मते एक दोन शॅक मालकांमुळे सर्वांना धारेवर धरणं बरोबर नाही, सरकारने यावर तोडगा काढला पाहिजे.