Banastarim Bridge Accident बाणस्तारी अपघात प्रकरणाच्या चौकशीवेळी संशयित परेश सावर्डेकर याने आपणच स्वत: कार चालवत असल्याचे सांगितले आहे.

तसेच संशयिताची पत्नी मेघना सावर्डेकर व तिच्या तीन मुलांची पोलिसांनी फौजदारी दंड संहितेच्या कलम 161 व कलम 164 खाली फोंडा न्यायदंडाधिकाऱ्यांसमोर जबानी नोंदविली. त्‍यावेळी त्‍यांनीही परेश हाच कार चालवत असल्याचे सांगितले आहे.

मेघना व तिच्या मुलांची वैद्यकीय चाचणी झाली आहे. संशयित परेश सावर्डेकर याने उच्च न्यायालयात जामिनासाठी अर्ज केला होता. तो 8 दिवसांची पोलिस कोठडी व नंतर 14 दिवसांच्‍या न्यायालयीन कोठडीनंतर मंजूर झाला आहे.

दरम्यान, संशयित परेश सावर्डेकर याची बाजू ज्येष्ठ वकील सरेश लोटलीकर यांनी मांडली. संशयित तसेच त्याच्या कुटुंबीयांनी पोलिसांना तपासकामात सहकार्य केलेले आहे. कार संशयित चालवत होता हे उघड झाले आहे.

सावर्डेकर कुटुंबीयांनी या अपघातात मृत्यू पावलेल्या कुटुंबीयांना तसेच जखमींना मदतीचा हात दाखवताना 2 कोटी रुपये न्यायालयात जमा केलेले आहेत. तसेच न्यायालय ज्या अटी घालीत त्या मान्य असतील असा युक्तिवाद केला.

जामिनासाठी घातलेल्या अटी

• एक लाख रुपये वैयक्तिक हमी व तत्सम रकमेचा एक हमीदार.

• क्राईम ब्रँचमध्ये आठवडाभर सकाळी १० ते दुपारी १ पर्यंत हजेरी.

• पासपोर्टची माहिती न्यायालयात सादर करणे.

• साक्षीदारांशी संपर्क साधू नये, तपासात अडथळा आणू नये.

• अधिकारी बोलावतील तेव्हा चौकशीसाठी उपस्थित रहावे.

• न्यायालयाच्या परवानगीशिवाय गोव्याबाहेर जाऊ नये.